Bat ka FKJGP ia ka kali masi beaiñ, shiteng miet pyllait ki pulit

Ka Federation of Khasi Jaintia & Garo People Khliehriat circle (FKJGP-KC) ha ka 7 tarik Lber ka la bat kawei ka kali kit masi beaiñ ka bym don Registration (No.plate) ha ryngkat ka jingdonlang ki pulit ha Kong Ong Check point ka Ladrymbai Police Outpost, East Jaintia Hills.

Hadien ka seng ka la tohkit bad pan ki kot ki sla ban pynshisha ba ki kit katkum ka aiñ hynrei na ka liang u nongniah um lah satia ban pynshisha, namar tang ka Iew masi ba don Licence ha East Jaintia kam pat don haduh mynta bad hadien ba kim don ki kot ki sla ka seng ka la aiti sha ki pulit ban leh ia kaba donkam, hynrei kaba lyngngoh haba kim don ki kot ki sla ki pulit ki pyllait ia katei ka kali kit masi hajuh ka miet khlem ka jingtip ka seng bad lada ki pulit ki kam ba la pyllait ba ki don ki kot ki sla ka dei tang ka jingda rapjot bad lada ki don ki dei ki kot thok baroh ki tip lut.

Ka jing kem ka seng ia kitei ki mar beaiñ ka dei hadien ba ka seng ka iohi man ka sngi ia ki kali kit masi ban leit sha Bangladesh kiba iaid sahuh wat por mynsngi ruh kim salia namar ki ioh jingiada na ki bor ka ain.

Ka seng ka ioh jingtip ba ki kali masi ki juh siew T.500 kawei ka Bolero pickup ban lait shah pyndik ha ki bor ka aiñ ha Ladrymbai police outpost kaba don ha Kong Ong, East Jaintia Hills, wat na ka rukom thep masi ka long beian namar ba la khapngiah bad ka ki la pynkheiñ ia ka aiñ 11 PCS Act-Cruelty to Animals, kumta ka seng ka buh jingkylli lada kam long be-ain, Balei pat ki shim T.500 bad lada ki bor ka aiñ ki ong kam dei beaiñ bad kam don ka jinglum pisa . Na ka liang ka seng ka dawa ban thung da ka Independence Inquiry ban lap ia ki jingshisha baroh, lada ki bor ka aiñ ki ia kyrsum ha ki kam beaiñ iano ki paidbah kin shaniah, ka seng ka panmab bad kam thew ia baroh kiba kyrsum ha ki kam beaiñ hynrei ki don katto katne ki Langiong ka pynthoh bria.

Ka seng ka sngewkhia hadien ba shah bat ia katei kali kit masi ki don ki Mafia bad Dalai kiba phone iu President ka FKJGP-KC ryngkat ka jingmaham ba kim dei ban tuklar ia ka iaid ka ieng ki kali kit masi hynrei ka seng kam pat kwah ban pynpaw kyrteng ia mynta.

Khadduh ka seng ka pynpaw ba kam tieng iano iano namar ban long nongialam kam dei kaba suk, kin don shibun ki nongshun ki diengpynkiang, hynrei ngin ym kynran dien wat lada dei ban shah kem ruh ngi long la khreh ban iakhun ia ki dawbah ka Jaitbynriew bad ka seng ka maham ba nangne shakhmat kan pynjur ia ka jingkhynra ia ki kali masi, namar ba ym tang ba ki kit beaiñ ia ki masi hynrei kitei ki Dalal ki dei ruh ki nongialam lynti ia ki Nong Bangladesh ban ioh rung tuh shapoh u pud u sam ka Jylla, la pynkut ka kyrwoh u President ka Seng u bah Michal Chyrmang bad na u Secretary bah Just Me Sana.