Bitar ki nongrep ia ka KHADC, bym pyntreikam ia ka aiñ ot kilo ki mar rep

Ki nongrep ha ryngkat ki nongialam ka Hill Farmers Union (HFU) hynne ka sngi ki la pynpaw ka jingbitar hadien ba kim shym la ioh ka jubab ba shai halor ka aiñ ban ym ot kilo ia ki mar rep. Ia kane ki nongialam ka HFU bad ki nongrep ki la pynpaw hadien ka jingwan iakynduh ia u Chief Executive Member (CEM) ka Khasi Hill Autonomous District Council (KHADC) u Bah Shemborlang Rynjah.Haba kren sha ki lad pathai khubor u President ka HFU u Bah Commander Shangpliang ula iathuh ba ka jingwan kynduh ia u CEM ka KHADC ka dei ban kylli halor ka jingpyntreikam ia ka aiñ Khasi Hills Autonomous District (Establishment, Management and Control of Markets) (Second Amendment) Regulation, Act 2021, kaba la ioh jingmynjur na u Lat ka Jylla ha ka 23 tarik u Naitung 2023.

U Bah Commander ula pynpaw ia ka jingbym sngewhun halor ka jingkynduh ia u CEM bad kynnoh ba ki nongrep kim shym la ioh jubab ba shai na u CEM ka KHADC.”Ka jingdawa pynduh noh ia ka jingot kilo ka dei la slem bad na ka por sha ka por ngi la wad ud sha ka Executive Committee (EC), hynrei haduh mynta ka EC kam shym la lah ban ai jubab ban pynbun ia ki nongrep” ula ong. U la ong, ba u Lat ka jylla ula ai ka jingmynjur ia ka aiñ ban khang ia ka jingot kilo, bad ka Council ka la dep ban pynkhreh ia ki rule ban pyntreikam ia kane ka aiñ, bad la dep ban phah ruh sha ka tnad District Council Affairs (DCA) jong ka Sorkar Jylla ban ioh ia ka jingmynjur bad na ka liang u CEM u la kular ba un buddien ia kane khang ba pynsted noh ia ka jingpyntreikam ia kane ka aiñ.

Ka HFU ka la kyntu ruh ia ka District Council bad kin phah da ki enforcement bthah ia ki nongkhaii ba kim dei ban ot kilo ia ki marrep hynrei na ka liang u CEM ym shem la ai ka jubab ka ba shai halor kane da kaba kdew ba ym sa shong bishar halor kane.