Bthah ka High Court ban jurip biang ia ki ‘Weighbridge’ ba kit palat pud ki trok

Ka Iingbishar Meghalaya High Court ka la bthah ia ki bor Jylla ban pyndep ka jingjurip ïa baroh ki weighbridge ba thew ia ki kali kit jingkit hapoh ka 30 tarik Iaiong 2025. Ïa kane ka jingbthah la pynmih da ka ïingbishar kaba kynthup ïa u Chief Justice IP Mukerji bad u Justice W Diengdoh haba shong bishar ïa ka PIL ba la ujor da u Tennydard M Marak halor ka jingkynnoh ba ki trok ba kit palar pud la shah ban iaid lyngba ki weighbridge kaba wanrah ka jingduhnong ba khraw ka sorkar ha ka jingioh lum khajna.U nongujor ula kynnoh ba ki heh sorkar ki ai lad ia ki kali ba kit palat pud ha kine ki sngi ban iaid lyngba ki weighbridge, kaba la wanrah ka jingduhnong ban lum khajna kum ka bai kit palat, ka cess, ka kuna, bad ka khajna ia ki mar ba shalan shabar ri.

Ka ïingbishar ka la pynksan ïa ka jingdonkam kyrkieh halor kane ka kam da kaba ong, “Ïa ka jingjurip baroh ki weighbridge ne jingkieng thew dei ban pyndep hapoh 30 tarik Iaiong, 2025. Ka kaiphod dei ban ai katkum hukum ba la pynmih ha 5 tarik u Nohprah, 2024, hapoh ka 2 tarik Jymmang, 2025.”Kum shibynta katei ka hukum, la bthah ia ka sorkar jylla ban pynkhreh bad aiti ia ka thup baroh ki weighbridge sha u nongmudui hapoh ka 19 tarik Rymphang, 2025. Lada lap ia kino kino ki weighbridge ba la jah na ka thup, u nongujor u lah ban pyntip sha ka sorkar, hadien kata yn sa pynkhreh ia ka thup ba khatduh. Ka iingbishar ka la bthah ban pynlong ia ka jingpeit bniah ia ka jaka kumba ar kynta ha man ki weighbridge ha por ba bun ki kali, kaba long katkum ka hukum ba mynshuwa ha ka 5 tarik u Nohprah, 2024.

Kham mynshwa, ka Kashari ka la bthah ia ka sorkar ban jurip ia ki Weighbridge bad ban peit bniah ia ki jingdawa ba la pynpaw ha ka PIL. Hynrei ka bench ka la lap ba ym shym la leh ia ka jingpeit bniah kaba biang. U nongiasaid ain jong u nongujor ula ong ba ym shym la ai jingtip lypa ia u nongujor halor ka jingjurip, kumba la bthah ka iingbishar, bad ba ka sorkar ka la pynlong ia ki jingjurip khlem da pyntip ia u.Halor kane, u Advocate General ula pyntip sha ka ïingbishar ba ka sorkar ka kloi ban pynlong ïa ka jingjurip ba thymmai da kaba bud ryntih ïa ka hukum jong ka ïingbishar.