Buh Mawnongrim ka sorkar T.96 klur ban shna surok Nongpoh-Umden-Sonapur

Ki sngi ban sah jingkynmaw bad ka jingphohsniew kan wan urlong noh na bynta ki phew hajar ngut ki nongshong shnong ka thaiñ Umden hi baroh kawei ha kaba mynta ka sngi ki la ioh ban sakhi noh ia ka jingplie ia u mawnongrim ban tei thymmai noh ia ka surok ba ki tip kum u Nongpoh-Umden-Sonapur (NUS) ha Ri Bhoi District. Lah ban kdew ka surok na Nongpoh sha Umden bad ter ter shaduh Sonapur ka dei kaba la sniew bad jot rathai da ki phew snem bad buh jingeh shikatdei ia ka leit ka wan ki paidbah khamtam ha ka kit ka bah, ka pang ka shitom bad kiwei kiwei, dei hadien ka jingiai shah kaba la palat phew snem mynta ki paidbah nongshong shnong kane ka thaiñ ki la sakhi lang ia ka jingsdang urlong ka jingphohsniew ka jong ki. Ia ka surok NUS, la mang na Nongpoh sha Umden ba don kumba 20 kilometre ha ka jinglut ban kot kumba 49.53 klur tyngka ia kaba la mang lyngba ka state plan ban tei ruh lyngba ka Intermediate lane ba 5.5 meter ka jingiar, katba na Umden sha Sonapur pat ba don kumba 38.6 kilometre yn tei ha ka jinglut ka ban kot kumba 47.20 klur tyngka lyngba ka PMGSY III batch I.

U Bah Prestone Tynsong haba ai jingkren ha kane ka sngi, u la pynpaw ia ka jingkmen ban don bynta lang ha kane ka sngi sah jingkynmaw jong ki paidbah ka thaiñ Umden kiban sakhi ia ka jingurlong noh ka jingphohsniew ka jong ki ban ioh ia u surok ba paka u ba ki la ap tmang la bun bun snem, ia kaba la buh por ban sdang noh ia ka jingtrei naduh unsnem 2025. U la pynpaw ruh ba ka sorkar jylla ha kine ki khyndiat snem ka la lah ban pynurlong ia bun tylli ki surok bad jingkieng kiba kongsan na bynta ki Shnong ki thaw jong ka jylla Meghalaya, ha kaba ka jinglut baroh ka la kot sha ki hajar klur tyngka haba kheiñ kyllum bad kynjoh sha ka 800 kilometre. U la iathuh ba sorkar jylla ka pynlut da ki phew hajar klur ha ka shisnem tangban shna ia ki surok bad jingkieng, da kaba pyntip ba palat spah tylli ki projek surok bad jingkieng ki la iaid shakhmat ban pyntrei lyngba ka skhim PMGSY tang na ka bynta ka mang tyngka jong ka snem 2024-25 kiba ka jingjngai ka lajan kot sha ka 800 kilometer. “Ha kine ki khyndiat snem, ka sorkar ka la mang pisa lyngba ka State Plan haduh T. 1100 klur, na ka PMGSY T. 1100 klur, ka CIRF kumba T. 400 klur, na ka RIDF kumba T. 140 klur bad na ka World Bank kumba T. 2000 klur ban pynurlong ia jingtei ia ki kam pynroi naduh ki surok bad jingkieng ha ki shnong ki thaw ka jylla ia kaba la kyrmen ba ki paidbah kin sa iohi ia ka jingkylla kaba khraw”, ong u Bah Tynsong.

Ha ka jingkren jong u MLA ka Nongpoh Konstituensi u Bah Mayral Born Syiem, u ba khlem da lah shuh ban kyrda ia ki ummat jingkmen, u la ai khublei kyrpang ia ka sorkar jylla ba lamkhmat da u Conrad K Sangma kum u Myntri Rangbah, u Bah Prestone Tynsong kum u Symbut Myntri Rangbah nalor kiwei kiwei kiba la don ka bynta kaba khraw ban pynurlong ia ka jingphohsniew bad jingangnud kaba da ki phew snem jong ki paidbah ka thaiñ Umden. U la pynpaw ruh, ia ka mynsiem ka jingsngewkhia bad ban pan mab na ki bor ka sorkar jylla, ha kaba ki la don ki jingtallaiñ nia bad jingkynthoh kiba bun na bun ki liang halor ka jingbym ioh ia u surok ba paka ha kane ka thaiñ, da kaba bynrap pat, ba ia kine baroh ka sorkar jylla ka la jubab da kaba pynmang ia ka song pisa kaba heh ban pynioh ia u ne u surok ba kongsan eh jong u NUS, da kaba pynpaw ruh ia ka jingkyrmen kaba skhem ba ka sorkar jylla kan nang theh ia ki kam pynroi bapher bapher hapoh kane ka dong bad ka thain. Ia u mawnongrim ban shna ia ka surok la wan ban plie da u Symbud Myntri Rangbah ka jylla u Bah Prestone Tynsong ha ka jingdonlang u MLA ka Nongpoh Konstituensi u Bah Mayral Born Syiem, MLA ka Umsning Konstituensi Dr. Celestine Lyngdoh, Bah Balajied Rani, MDC ka Nongpoh, ki ophisar ka tnad PWD Road bad Building ka jylla nalor kiwei ki heh ka sorkar.