Buh mawnongrim T.14 klur ban pynitynnad ia ka Iewduh, pynbna u MR ban ai sa T.20 klur

U Myntri Rangbah ka jylla u Conrad K Sangma hynne ka sngi ula buh ia u mawnongrim ban pynitynnad ia ka Iewduh ha ka wat Baar, kaba la bei tyngka da ka North Eastern Council (NEC) ha ka jinglut ba T.14 klur. Ha jingialang la donlang ki symbud Myntri Rangbah kynthup u Bah Prestone Tynsong bad u Bah Sniawbhalang Dhar, ka Myntri ka rep ka riang ka Kong Ampareen Lyngdoh, u MLA ka South Shillong u Bah Sanbor Shullai, u Syiem ka Hima Mylliem u Paiem Ainam Manik Syiem, ki ophisar sorkar bad NEC lem bad ki nongshong dukan bad ki nongdie madan ha Iewduh bad kiwei kiwei. Haba kren ha ka jingialang u Myntri Rangbah ka jylla u Conrad Kongkal Sangma ula ong, ba ka sorkar jylla ka la sdang ki kam ha wat banyngkong T.5 klur ban pynbha bad lah ban sakhi ia ka jingiaid ka kam bad ka sorkar ka dang pynkhreh ia ka Detailed Project Report (DPR) na bynta ka wat balai T.20 Klur ban pynbha shuh ia ka Iewduh.

“Haba kyllum lang ia baroh ka jinglut jingsep ban pynbha ia ka Iewduh kan kot kumba 40-45 Klur Tyngka ha ki 3 tylli wat” ong u Conrad bad ula kyrpad ia ki 5500 ngut ki nongshong dukan bad ki nongdie madan ba la rejistar ha ka Hima Mylliem ban pynneh ia ka jingkhuid ka Iewduh. Ula bynrap dei lyngba ka jingiatreilang baroh, yn lah ban pynkylla dur ia ka Iewduh kum ka iew ba itynnad ym tang ka nongbah Shillong hynrei ha ka thain shatei lammihngi baroh kawei. U Myntri Rangbah ula ong, wat la ka jylla ka la iaid bad kiew shaphrang ha ka roi ka par hynrei u sngewbynniaw ba kam shym don ka jingkylla ha ka Iewduh mynta la palat 35 snem.Shwa kane, u Myntri Rangbah ka jylla ryngkat bad ki Myntri Sorkar, u Syiem bad ki Myntri ka Hima Mylliem ki la leit jurip ia ka jingshna ia ki lynti iaid ba shna katkum ka projek ha ka wat banyngkong.

U Conrad ula iaid ha kylleng ka Iewduh haduh ban da poi sha ka Parking Lot kaba don mar pyrshah ia ka Anjalee Cinema Hall ia kaba la pynlong ia ka jingialang paidbah. Ha kane ka jingialang, la sam ruh ia ki cheque mar 10,000 tyngka lyngba ka CM Urban Livelihood Grant sha ki nongdie madan ka Iewduh ba la rejistar ha Hima Mylliem.