Buh mawnongrim u Myntri sorkar pdeng 50 tylli ki projek ri dohkha ha NE kynthup ha Meghalaya

Ka Sorkar Pdeng hynne ka sngi ka la mynjur bad mang T.50 lak ia ki projek na bynta ban kyntiew kam ri dohkha ha East Khasi Hills District.U Myntri ka sorkar pdeng u Rajiv Ranjan Singh ula buh ia u mawnongrim na ka bynta 50 tylli ki projek ban pynmih dohkha ha ka thain shatei lammihngi kaba kot T.50 klur hapoh jong ka Pradhan Mantri Matsya Sampada Yojana (PMMSY) ha ka jingialang jong ka Northeastern Region States Meet ba la pynlong da ka tnad ri dohkha bad ka sorkar pdeng ka la bhah T.38.63 klur na ka T.50 klur. Ka sorkar pdeng ka la mang ban pynlut T.50 lak na ka bynta ka projek ha Meghalaya kata ka jingbhah ka sorkar pdeng ka long T.27 lak bad ka bhah na ka bynta ki nongioh jingmyntoi ka long T.20 lak bad ka projek ha Meghalaya ban kyntiew ia ka kam ri dohkha ha ka East Khasi Hills District. Ka jingthmu ka long ban khring ia ki nongjngohkai bad ban kyntiew kam ri dohkha kumjuh ban thaw k ki lad ioh kam ioh kam ki trai jylla.

Ka sorkar pdeng ka la mang ban tei ka Integrated Aqua Park ha Darrang District, Assam,  ka Fish Feed Plant ba heh ha Kamrup District, katba ha. Manipur yn tei ia ki Ice Plant bad Cold Storage Unit ha Thoubal bad Imphal District.Yn sdang ruh 3 tylli ki projek ha Nagaland kynthup ka jingtei ia ka Freshwater Finfish Hatchery ha Mokokchung bad Kiphire district, katba ha Tripura yn tei ia ka Ornamental Fish-Rearing Units bad Finfish Hatchery. Ka thain shatei lammihngi ka don ka bynta ba kongsan ban lah pynmih dohkha na lade bad ka kam ri dohkha, ka sorkar ka ieng skhem ban kyntiew ia ka thain.

Ka sorkar ka la mynjur ban mang T.2,114 Klur ia ka kam ri dohkha lyngba ka Blue Revolution Scheme, ka Fisheries and Aquaculture Infrastructure Development Fund (FIDF) bad ka Pradhan Mantri Matsya Sampada Yojana (PMMSY). Kine ki sienjam ki la iarap ban pynbiang ia ki jingtei ba kongsan ban pynkhlain ia ka jingpynmih dohkha. Haduh mynta ka jingpynmih dohkha ha ka thain shatei lammihngi ka la kiew na ka 4.03 lak ton ha u 2014-15 sha ka 6.41 lak ton ha u 2023-24 bad kane ka jingkiew ka la kynjoh sha ka 5%.