Plie u Dr. WR Kharlukhi ar tylli ki surok ha ka thaiñ Umsning

Ka long shisha ka sngi kaba kmen bad kaba sah jingkynmaw ha kaba mynta ka sngi, u Dr. W.R Kharlukhi, MP ka Rajya Sabha ula ioh ban plie ar tylli ki surok kynthup ia ka  surok Umiarong sha Lawbyrwa ba pyniasoh ia ka shnong Sumer sha Kyrdemkulai ha ka jingjrong ba 750 meter bad ka surok ba pyniasoh ia ka shnong Lawbyrwa sha ka dong Mawnai ba jngai 585 meter. Ia kine ki surok kiba la trei pyndep ruh ia ka jingsiang rong, la tei ha ka jinglut kaba la kot kumba 1.37 klur lyngba ka tnad PWD Road, Umsning Division. La wan ban sakhilang ruh ha kane ka sngi, da u Bah R. Kharkrang, Rangbah shnong Lawbyrwa, Bah D. Laloo, Executive Engineer, PWD Roads, Umsning Division, u Dr. C.R. Lyngdoh, Co-Chairman of Meghalaya Infra-tech Consultancy & Innovations Limited lem bad kiwei kiwei.

Haba kren ha kane ka sngi, u Dr. WR Kharlukhi kum u MP ka Rajya Sabha, u la pynpaw ia ka jingkmen kaba khraw ban ia donlang bad ki nongshong shnong kane ka thain ban  sakhi ia ka jingurlong ki  jingphohsniew bad ka jingangnud ka jong ki ban ioh ia u surok u ba bit ba biang u ba long ruh u budlum ka roi ka par bad ka jingsuk ha ka leit ka wan u paidbah.

U la iathuh  kum ki nongmihkhmat paidbah kin nang iai trei shitom ban nanglah ban wanrah ia ki kam pynroi kiba pher bapher hapoh ki shnong ki thaw ka jylla na ka bynta ka jingmyntoi bad ka jingkyrkhu jong ki paidbah nongshong shnong khamtam ha kaba ia dei bad ka jingpynurlong ia ki jingdonkam kiba hakhmat eh kiba long kum ki surok ki lynti ki syngkien bad kiwei kiwei.