Thang ka Congress ia ka Tyngshop u CEC bad dawa dawa hiar shuki

Ka Meghalaya Pradesh Congress Committee (MPCC) hynne ka sngi ka la pynlong ka jingiaid paidbah ban dawa hiar shuki bad kem mardor ia u Chief Election Commission (ECI) ka Ri India u Gyanesh Kumar.

Ia ka Rally ba la ialam da u President ka MPCC u Bah Vincent Pala la pynlong na ophis treikam ka Congress kaba don ha Khyndai Lad bad pynkut ha jaka ieng kali kaba don mar pyrshah ka Additional Secretariat ha kaba ki nongialam ka Congress ki la thang ruh ia ka tyngshop jong u Chief Election Commission (ECI) ka Ri India u Gyanesh Kumar.

Haba kren sha ki lad pathai khubor u President ka MPCC u Bah Vincent Pala ula ong, ba ka jingiakhih ka dei ban pyrshah ia u Gyanesh Kumar CEC uba la pynjaboh ia ka rukom treikam ka Election Commission jong ka Ri India.

U Bah Pala ula kynnoh ha ki 10 bnai ki la don 10 tylli ki jingpyrshah (Objection) da ki 2 ngut ki Election Commissioner hynrei u Gyanesh Kumar um shym la sngap ia ki bad u pyniaid beit ia ki kam hapoh ka Election Commission khlem jingsalia.

“U Gyanesh Kumar ula pyniaid ia ka Election Commission da ka jingiarap ka BJP hadien ba la wanrah jingpynkylla ha ka ain (Act), kane ka pyni ba ka BJP ka ialehkai bad ka hok u paidbah haba ia dei bad ka jingjied ia la ki nongmihkhmat” la ong u Bah Pala.

U Bah Pala ula ong, ha bun tylli ki Jylla ka Congress bad kiwei ki Party ka la dei ban jop ia ki ilekshon bad ula kam ruh ba hapoh ka Jylla West Bengal bun ngut ki nongthep Vote ki la shah weng na ka thup kyrteng thep Vote (Electoral Roll).

Ula kynnoh ba ki paidbah mynta ki la sngewthuh ba ia ka thup kyrteng thep Vote (Electoral Roll) la pynkylla ne la weng ia ki kyrteng da ka Election Commission lyngba ka jingbthah ka BJP.

“Ngi dawa ba u Gyanesh Kumar u dei ban hiar shuki mardor bad hadien ba u hiar shuki ka Sorkar Pdeng ka dei ban thung ka Commission tohkit pyrshah ia u bad kem mardor ia u khnang ba ki paidbah kin ai biang ka jingshaniah ia ka Election Commission of India” ula ong.

U Bah Pala ula ai khublei ia ka Youth Congress, ka Mahila Congress bad ki nongtrei ka party kiba la iashim bynta ha kane ka jingiakhih wat ka jingpyntip ba dier por.