Ngam sngewpher lada shah pynhiar shuki, ka kam MLA ban shakhri paidbah: Methodius Dkhar

U MLA ka HSPDP uba dei ruh u Myntri sorkar u bah Methodius Dkhar ula ong ba um sngewpher lada u shah pynhiar shuki kum u Myntri sorkar namar ba ka kam jong u kum u MLA ka long na bynta ban shakhri ia ki paidbah ka konstiwensi.

Haba kren sha ki lad pathai khubor u bah Methodius ula ong haba kane ka sorkar MDA ka ai ka jingbahkhlieh ia u kum u Myntri, ka dei ka kamram jong u ban trei ban pyndep hok ia ka kam naduh mynsiem na bynta ba ka bha ka miat jong ki paidbah.

“Nga la shah jied kum u MLA na bynta ban shakri ban trei ia ki paidbah ka konstiwensi, namar kata ngam sngewkhia eiei ia ka shuki bad yn da ka por ka la kut, nga dang iai long kum u MLA ban ngan trei na bynta ki paidbah ka konstiwensi, ” ong u bah Methodius.

Ha kajuh ka por, halor ki khubor ba la saphriang ba ka sorkar MDA ka lah ban khyllem noh hadien ba ki 8 ngut ki MLA ka UDP dang shen ki la leit ban iasoh noh sha ka BJP.

U bah Methodius ula ong ba ka sorkar MDA hapoh ka jingialam jong u Conrad K. Sangma kum u Myntri Rangbah ka dang khlain bad ka dang skhem bha.

“Ka sorkar MDA kam don jingma bad kan ym khyllem, wat la ki phra ngut ki MLA ka UDP dang shen ki la leit ban iasoh sha ka BJP. Nga kwah ban pyntip sha ki paidbah ka jylla ba ka sorkar ka skhem bad ka khlain bha haduh mynta, ym don kano kano ka jingma ba ka sorkar kan khyllem noh,” la ong u bah Methodius.

U la ong ba ka sorkar kan iai bteng ban shakri na bynta ka bha ka miat jong ki paidbah ka jylla baroh kawei.