Nga la kren bun sien ba don ka jingbym hun ia ka rukom treikam hynrei u nongalam u kyntait : Paul

U MLA ka UDP na West Shillong constituency u Bah Paul Lyngdoh ula ong ba ka jingkhyllem ka UDP ka dei ka bym lah kiar bad u Nongialam jong ka u im ha ka jingkyntait bad ula kam ruh ba ka seng riewlum kaba don 12 ngut ki MLA ha Khasi-Jaintia lai snem mynta kan sa sah shen sa tang uwei.

Haba kren sha ki lad pathai khubor u Bah Paul ula ong ba um kyndit satia ia ka jingleit iasoh ki 8 ngut ki MLA ka UDP sha ka BJP ha Delhi bad ma u ruh ula sdang ban iasyllok bad ki nongkyrshan ia ka sienjam ba un sa shim.

“Nga la kren la bun sien hapoh ka party ba ka don shibun ka jingbym hun ia ka rukom treikam ka party. Kaei kaba sngewsih ka long ba u nongalam u shu kyntait beit, ki shu kyntait ba ym shym don eiei satia” la ong u Bah Paul.

Haba kdew ia ka jinghiar sted ka UDP, ula ong “Hapoh ka jingialam une u President ba mynta ha kine ki lai snem, ka party kaba don 12 na ki 36 seat ha Khasi-Jaintia ka la sah mynta satang 4 bad na kine ki 4 ngut ruh, ki la paw ki dak ki shin ba ka lah ban sah satang uwei”.

U Bah Paul ula ong ba ka jingphet seng na ka UDP ka lah ban nym pat kut satia. “Ki dak ki pyni ba ki don ki MLA ki ban sa leit pat sha kiwei ki party” ong u Bah Paul.

Halor ki khubor hamsaia ba ma u da lade u thmu leit iasoh sha ka BJP, u Bah Paul ula ong “Kam donkam ia ki jingkynnoh lane jingpynman. Nga don ha ka khep ba nga dang iasyllok bad pan jingmut na ki nongkyrshan jong ka UDP West Shillong constituency namar ka party ka lah ban sah satang uwei lane arngut ki MLA, kumta ngi hap ban leh eiei ba kumno ngin leh nangne shakhmat”.

Haba kylli la un iai neh bad ka UDP, ula ong ba ki jingiasyllok ki dang iaid bad baroh ki nongialam bad kane kan shim por.