Kim neh slem ki Seng Riewlum, ki bun tang ki kular kim lah ban pynurlong: Pala

U President ka Meghalaya Pradesh Congress Committee (MPCC) u Bah Vincent Pala ula kam ba ki seng riewlum (Regional Party) hapoh ka Jylla kim lah ban neh slem namar ba ki bun satang ki jingkular hynrei kim lah pat ban pynurlong ia ki jingkular.

Ia kane u Bah Pala ula kynthoh halor ka jinglah ka BJP kaba dei ka National Party ban tan ia 8 ngut na ki 12 ngut ki MLA ka UDP kaba dei kawei napdeng ki seng riewlum (Regional Party) kaba heh bad kaba rim tam hapoh Meghalaya.

Haba kren sha ki lad pathai khubor u Bah Pala ula ai nuksa iaki seng riewlum (Regional Party) kiba la jah noh kum ka PDF, ka KHNAM ka UDP bad HSPDP kiba dang mar 4 bad 2 ngut ki MLA hapoh ka Iingdorbar Thaw Ain.

U Bah Pala ula ong ba ki seng riewlum (Regional Party) ki bun satang ki jing kular hynrei ka eh bha pat ban pynurlong bad dei namar kane ka daw bun ki seng riewlum ki duh noh ka jingshaniah na ki paidbah.

“Lada ngi phai sha ka KHADC ruh ki ba bun ki jingkular hynrei mynta ki mih ki jingeh na ka jingbym lah ban pynbeit halor ki kam Syiem, ki kam Hima, kumta ki paidbah ki la sdang bitar ia ka Party ba synshar ha District Council” la ong u Bah Pala.

“Nga tharai ki seng riewlum (Regional Party) kim lah ban neh namar kum ka PDF ka KHNAM bad kiwei ha kaba wat ka HSPDP bad UDP ruh mynta ki la sdang tlot” ula ong.

U Bah Pala ula ai nuksa ruh ia ka jingsdang tlot noh ki seng riewlum (Regional Party) ha kiwei jylla kum ka Bihar, Odisha bad West Bengal ha kaba dang shen ka TMC ka la shah rem noh ha ka BJP.