Buh thong ka sorkar ban tei 5 Star Hotel ba kyntiew ia ka Jylla

U Myntri Rangbah ka jylla ula ong ba ka sorkar ka la buh thong ban  pynlong ia ka jylla Meghalaya kaba riewspah kaba bit ba biang ha ka ioh ka kot ha u snem 2032. Ha ka mang tyngka ba wanrah dang shen ha Iing Dorbar Thawain ka jylla, u Conrad ula maitphang ia kiba bun ki mat ban kyntiew ia ka jylla ha ka ioh ka kot khnang ba kan long kaba bit ba biang ha 2032 bad kan long kawei napdeng ki shiphew tylli ki jylla ha ka ri ka ban riewspah. Ban pynurlong ia kane, u Conrad u la ong ba ka sorkar ka don ia ka thong ban buh saw tylli ki Hotel 5-star ha ka jinglut kaba T.900  klur ha Umiam, Sohra, Mawdiangdiang bad ha Khanapara. Kine baroh ki dang don hapdeng ka jingpynkhreh lyngba ka PPP mode.

Ula ong ba ka sorkar ha kine ki hynniew snem, ka la buh thong ban kyntiew na ka 30 percent sha ka 80 percent ka jingioh ki nongrep na ka kam rep kam riang kum na ka jingrep u tit, u soh strawberry, u sying, shynrai nalor kiwei de ki marrep. U Myntri Rangbah ula ong ba ki jaka ba rep ia u Sohmarit la pyniar na ka  2,083 hectare ha 2020 sha ka 3,254 hectare, u coffee na ka 337 hectare sha ka 785 hectare bad ka jingpynmih ia u tit ka la kiew na ka 27 MT ha u 2018 sha ka 171 MT.

Ula ong ba ka sorkar lyngba ka CM FARM ka la ai T.40 klur na bynta u snem 2025-26 bad ka buh thong ban kyntiew sha ka 10,000 hectare ka jaka ha kine ki lai snem ban wan.