Ka jingshah kyntait ki MLA ia ki skhim pynroi, ka plie lad ban bamsap : Dr Mukul

U Nongialam ka Liangpyrshah u Dr Mukul Sangma hynne ula ther ia ka Sorkar Jylla bad kynnoh ba kam shym la kynthup lang ia ki MLA ba pyntrei ia ki skhim bapher bapher hapoh ka constituency. Haba shimti ha ka jingiatai halor ka Mang Tyngka, u Dr Mukul ula kynnoh ba kane ka jingbym pyntip lang ia ki MLA ban pyntrei ia ki skhim ne project ha ki constituency, ka plie lad ia ki kam bamsap. U Mukul ula kam ha ka jingleit jurip jong u ïa artylli ki District hapoh ka thaiñ Garo Hills, ula shem ba ka jingpyntrei ia ki skhim kam long katkum ki kyndon ba ka pruid dak ha ka Detail Project Report (DPR).

Ula kynnoh ka jingshah kyntait ki MLA, kiba don ha ka liang pyrshah ne ha ka Sorkar halor ka jingpyntrei ia ki skhim bapher bapher, ka pynpaw ba ka Sorkar kam don jingkitkhlieh ban pyntrei hok ia ki skhim. “Nga pynpaw ia kane katkum ka jingpynsngew u MLA na Rongjeng constituency, uba la kdew shisha ia ka jingbun ki skhim ba dang pyntreikam hynrei kum u MLA ka thaiñ um don jingtip eiei” la ong u Dr Mukul.

Haba bynrap ia ka jingdonkam ban don ka jingpeit bniah ia ka imlang sahlang (Social Auditing) ia ki jingpyntreikam ia ki skhim, u Nongialam ka Liangpyrshah ula ong, “Lada ki MLA ba don ha ka Sorkar kim tip kan ai lad ban bamsap namar kata ka Sorkar ka donkam ban pynkhlain ia ka (Social Auditing). “Ka pla tyngka paidbah dei ban pynlut na ka bynta ka jingbha paidbah, kynthup ia baroh ha ka imlang  sahlang” u la ong.