Kurup ki Nongïalam Shnong 276 plastik ka Kyiad Pyrsi ha Nongpoh

Ki Nongkitkam Shnong jong ka Dong Upgate, Nongpoh, ki la ioh ban kurup haduh 276 song ki kyiad pyrsi na kawei ka jaka ha Surokbah, Nongpoh, ha ka sngi U Blei. Hadien ka jingkurup ïa kine ki kyiad ki la pynpait noh ha katei hi ka jaka.
Kane ka jingkurup ka la jia hadien ba ki Nongkitkam Shnong ki la ioh jingtip na ki nongleit nongwan shaphang ka jingdon ki briew kiba die bad shong dih kyiad pyrsi ha katei ka jaka. Ka jinglong jong katei ka jaka ka la pynwit bad pynsalia ïa ki nongleit nongwan, khamtam ïa ki khyllung, ki khynnah bad ki kynthei kiba leit jingïaseng.
Hadien ka jingioh jingtip, ki Nongkitkam Shnong jong ka Dong Upgate Nongpoh, hapoh ka jingïalam jong u Bah Albinus Lamo, Rangbah Dong, ki la leit ban jurip ïa katei ka jaka. Ha ka jingjurip, ki la lap bad kurup haduh 276 song ki kyiad pyrsi kiba la song ha ki plastik.
Ki Nongkitkam Shnong ki la pyntip mar-mar sha ki bor Pulit ka Nongpoh halor kane ka jingjia. Hadien ka jingpoi ki Pulit ha katei ka jaka, ki Pulit ki la sakhi ïa ka jingdon jong kitei ki kyiad bad ki la pynpait lut ïa ki ha katei hi ka jaka.
Katba ki briew kiba donkti ban die bad shong dih ïa katei ka kyiad, ki la phet krad noh na katei ka jaka mar sien iohi ïa ka jingwan poi ki Nongkitkam Shnong.
Ka jingïoh kurup jong ïa kitei ki kyiad ka pyni ïa ka jingïatreilang hapdeng ki Nongkitkam Shnong bad ki bor Pulit ban tehlakam ïa ka jingdie bad jingdih kyiad pyrsi ha ki jaka paidbah, khamtam ha ki sngi ba ki paidbah ki leit jingïaseng bad ban pyllait ïa ka shnong na ki kam kiba lah ban pynwit ïa ka shongsuk shongshngaiñ.