Rung BJP u Dr. Jemino ryngkat ki nongkyrshan, kam ban ialam ia ka sorkar ha u 2028

Hadien Khatsan bnai mih pyrthei biang u Dr. Jemino Mawthoh ha ka sain hima-sima bad rung syndon sha ka party Bharatiya Janata Party (BJP) hynne ka sngi Saitjain.
U Dr. Jemino uba dei u MLA bad General Secretary barim ka United Democratic Party (UDP) haba kren ha ka jingialang, ula ong ba u ka jingmih noh jong u na ka UDP, ka dei ka jingrai jong ki nongkyrshan jong u hi bad ka jingrung sha ka BJP ruh ka dei ka rai jong ki hi.
U bah Jemino ula ong ba ula buh jingmut ban mih noh na ka UDP naduh u snem 2023 hadien ba u la shah rem noh ha ka election MLA.
“Ka jingrung jong nga sha ka BJP ka long hadien ba nga la pyrkhat bad bishar bha, bad haba nga peit ia ka Meghalaya bad ka long ka man ha ka sainpyrthei ka jylla, nga sngew ba ka BJP ka dei ka party kaba biang eh, wat la ki la don kiwei ki seng kiba la iasyllok bad iawer ia nga ban rung sha ka party,” ula ong.
U la ong shuh shuh ba u la iohi bun ki jingkylla ha ka ri naduh u snem 2014 ba synshar ka BJP, naduh ka roi ka par bad ki policy ba ka la wanrah.
U Dr. Jemino ula ong ba naduh u snem 2014, ula iohi ba ki don shibun ki jingkylla hapoh ka jingsynshar ka sorkar BJP bad kawei kaba la pynkylla ia ka jingmut jong u, ka long ba ka BJP ka don ia ka thong na bynta ka ri kata ka Viksit Bharat ban pyllong ia ka India ka ri kaba kiew ha u snem 2047.
U la Iathuh ba naduh u snem 2022 ki nongialam ka BJP naduh Delhi ki la wan ban iasyllok bad u, hynrei ha katei ka por u la pynpaw ba u sngew ba um lah ban shu iehnoh ia ka kam bad ka jingiadei jong u bad ka UDP.
U Dr Jemino u la iathuh ba hadien ba u la iehnoh ia ka kam nongialam jong ka UDP, dei u Bah MH Khrakrang uba nyngkong ban pynpaw ba u kloi ban pdiang ia u sha ka BJP.
Ia u Dr Jemino la pdiang da u President ka BJP Meghalaya, u Rikman G Momin ha ka jingdonlang ki nongialam ka party, u Bah AL Hek, u Bah MH Kharkrang nalor kiwei ki nongialam ha ka jingialang kaba la long ha ophis BJP.
U Dr Jemino Mawthoh udei u MLA barim ka Nongthymmai constituency bad udei u General Secretary barim ka UDP uba la iakhun ruh ia ka election MP ha u snem 2029. U dei ruh u nonghikai (Associate Professor) ha skulbah North Eastern Hill University (NEHU).
U Bah AL.Hek haba kren ha kane ka sngi, ula pdiang sngewbha ia u Dr. Jemino sha ka party.
U bah Hek, u la ong ba naduh u snem 2021 ula buddien ia u Dr. Jemino ban pynbor ia u ban wan iasoh sha ka BJP ha kaba ma u bad u Rituraj Sinha u nongialam barim ba khmih ia ka BJP Meghalaya, ki la leit sha Iingsah jong u la busien ban kyrpad ia Dr. Jemino ban wan iasoh ban iakhun ia ka ilekshon 2023. Hynrei u Dr. Jemino udei u briew ba don ia ka nongrim ba skhem, ha shwa ban iasoh ia kano kano ka party u da iehnoh kam bad u shong pyrkhat bun bnai shwa namar ba um kwah ban pynmong iano iano ruh.
Ha kajuh ka por ubah Hek ha kane ka sngi ula pynbna paidbah bad kam ba ka BJP kan ialam ia ka sorkar ha Meghalaya ha u snem 2028.
U bah Hek ula ong ia kiba don ha ka jingialang ba ki dei ban kynmaw ia ki kyntien ba u kren mynta ka sngi ba ka jylla Meghalaya kan sa ioh ia ka sorkar kaban ialam ka BJP ha ka elekshon MLA ban wan.
“Ka jingwan iasoh u Dr. Jemino sha ka BJP kan phah ia ka khubor kaba khlain sha ki paidbah ka jylla ba ka BJP kam dei ka seng kumba la kynthoh pyrshah ki paidbah,” ula ong.