“Ngeit ha lade bad wat kynran dien” kyntu u Dr. Shakil ia ki samla

“Ngeit ha lade bad wat ju kynran dien” ka dei ka khubor pdeng u Dr. Shakil P. Ahammed, IAS, Chief Secretary ka Meghalaya haba kren kum u Kongsan ha ka jingrakhe ïa ka Shillong Onam 2026 ha Soso Tham Auditorium ha ka taiew ba la dep bad u la wer ia ki samla ban don mynsiem iai shah, ka jingtrei shitom bad ka mynsiem wad bniah ba la batai ia ki nong Malayalis.

Haba kren ha ka jingïalang ka All India Malayali Association Meghalaya ryngkat ka jingïatreilang bad ka Kalakairali, Shillong, u Dr. Shakil u la ong ba ki Malaya ki don ka sap naduh mynnyngkong ban ïaid lait ïa ki sawdong sawkun ba la tip ban wad ïa ki lad ki lynti ha kylleng ka pyrthei bad ban ïahap bad ki jaitbynriew bapher bapher. U la ban jur kane ka dei ban don ryngkat bad ka jingkular ban long ki nongshong shnong ba don ka jingkitkhlieh bad ban noh synniang. Haba ïasam ïa ki jinghikai na ka jingïaid lynti, ula kyntu ïa ki khynnah ba kin don ka jingshaniah ha lade, wat la ki kynduh ïa ki jingeh da ka jingkut jingmut ban ym duh jingkyrmen ïa ki jingangnud jong ki.

Ia ka jingrakhe ki la pynlong da ki dkhot ka jaidbynriew Malayalee bad ki paralok ka Kerala ha Shillong, kaba pynpaw ïa ka mynsiem ka Onam kum ka tamasa jong ka jingïatylli. Ha ka prokram la pyni ia ki jingpyninam ia ka kolshor tynrai, ka put ka tem bad ka shad bud sa ka Onam Sadya tynrai.

Ha kane ka jingialang la ai khusnam Kalakairali Kesari Award 2026 ia u C.O. Koshy halor ka jingnoh synñiang ha ka pule puthi, ka jingtei ïa ki jaka pule bad ha ka imlang sahlang. Ula trei palat 12 snem ha Patkai College hajan Dimapur bad jan 16 snem kum u Principal ka Army Public School, Shillong, u Koshy ula long kum u nonghikai bad nongaibuit ia ki pateng ban wan bad ha ka imlang sahlang jong ki Malayalee.

Kumjuh la pynkup burom ïa ka Biana Momin kaba shim bynta ha ka phlim Malayalam Eko Mlathi Chetathi. Kaba pynpaw ia ka jingiadei ka kolshor hapdeng ka Meghalaya bad ka Kerala bad ka imlang sahlang bad ia ka sap kyrpang jong ka.

Ia ka jingrakhe la pynkut da ka Sadya tynrai, ba pynlong ia ka imlang sahlang ban iatylli haduh ka mynsiem bashisha jong ka Onam kaba rakhe ia ka pateng, ka jingiadei paralok, ka jingjop bad ka jingiatylli ki briew ha kano kano ka jaka ba ki shongshnong.

Kiba la ai jingkren ki long u Aquarius Mathew, President, Baby Thomas Convenor ka jingrakhe ïa ka Onam, u Pradeep Pillai, u nongpeit ia ka AIMA National co-ordinator, u Jefery Shajan, Secretary ka synjuk.