Balei phim rung BJP ban ioh plie dewiong, ong u Amit Shah ia ki MLA UDP

U Kyrmen Shylla MLA ka Khliehriat Constituency mynta ka sngi ula lum ia ki paidbah nongkyrshan ha shnong jong u ha Byndihati East Jaiñtia Hills District na ka bynta ban pynshai paidbah halor ka jingmih khubor ba ki MLA ka UDP kin rung sha ka BJP.

Bad ha ka jingpynshai u ong, kumba ia u la jied da u paidbah na ka bynta ban peit ia ka eh ka shon ka constituency u sngew donkam ruh ban ioh ka rai na u paidbah hi shwa ban iaid shakhmat.

Halor ka jingleit iakynduh ba dang shen jong u lem bad kiwei pat ki para MLA UDP ia u Amit Shah ula pynshai ba ki leit pynsngew ia ki jingeh halor ka jingthmu pynkylla ia ka aiñ FCRA, namar ba don ka jingsyier ioh lehse yn shah ktah ki jingtei ïingmane nalor kiwei ki kam pisa ba wan na bar ri.

U iathuh na ka liang u Amit Shah ula jubab ba yn da treikam kane ka aiñ, kan treikam ia ka bynta ba shakhmat ym ia kaba la dep shadien bad ym donkam ruh ban ai jingkheiñ ia ka pisa ba la ioh naduh ki por mynshwa.

Ki la pyntip ruh ba ka jylla Meghalaya dei ka Scheduled Tribe State donkam ban pynlait ia ka jylla na ka FCRA, ha kajuh ka por ki la iasaid ruh ba ha baroh ki Balang Christan tang 16% wan ka pisa nabar ri kiba tam pat sha ki Hindu bad Muslim.

Nangta ki la iakren halor ka mat plie dewiong, ka MRSSA, ka Them Metor kumjuh ban ithuh ia ki Seng khasi Niamtre kum ki rit paid ne ki Minority Status.

Ki la pynsngew ruh halor ka Land Custom khnang ban pynsuk ia ka khaïi pateng sha Bangladesh bad kiwei ki jylla, ban pynrung ia ka ktien Khasi hapoh ka 8th Schedule.

U ong haoid baroh kine ki mat dei kiba donkam tangba na ka liang jong u la kham ban jur ban iakren kylli jingmut na u Amit Shah halor u dewiong khnang ban ioh trei lang wat kiba don jaka barit ruh, namar naduh ba khang dewiong ha u snem 2014

ki paidbah ki la mad shibun ki jingeh ha kaba la mih ruh ki jingiakhih wat ban duh ia ki mynsiem briew ha East Jaiñtia Hills, bad halor kane ki seng bapher bapher ryngkat ka sorkar ki la pynsngew sha ka sorkar kmie ia kane ka kam tangba haduh mynta ym pat lah ban leh katkum ka jingkwah ki paidbah.

U kubur ba watla ia ka jingtrei dewiong la plie ha ka Jylla da ka Open Cast Mining hynrei pat ka ktah jur bha ia ka jinglut namar ym don jaka ban bret ia ka khyndaw ba la dep tih na ba hap ban ngam shapoh da ki spah phut ban ioh khlong dewiong.

Bad na ka liang u Amit Shah haba ioh sngew ia kine ki mat jingdawa baroh, ula ong ia ki haba kat kine ki jingdawa balei phim rung noh sha ka BJP naba ka la kwah ban don MLA ha Meghalaya bad ba ka la juh pan 5 ngut ki MLA khnang ban ioh plie dewiong, ha kaba na ka liang jong ki ruh ki la pan por ban pyrkhat ia kane da ka ban leit pynsngew sha ki paidbah.

Kumta da ka jingkyrmen ban ioh leh ki kam ba bha ia u paidbah ka 6 Khliehriat ha kane ka sngi ula pan ka rai na u paidbah.

Hadien ka jingkren u Kyrmen Shylla ki paidbah ki la ia shim bynta ban kren pashat jingmut bad baroh ki la pynsngew ka jingai jingkyrshan ia u lada u leit joit sha ka BJP da kaba ki khmih lynti ban lah plie dewiong kumba ha ka sorkar kmie la synshar da ka BJP.