Ki runar bym lah ithuh hynne ka sngi ki la kawang petrol bom ia ka ophis jong ka tnat Directorate of Mineral Resources (DMR) ha Risa Colony, Shillong.
Kane ka la jia ha ka por 3:32 nohphai sngi ha ka por ba ki nongtrei ki dang don ha ki kamra ophis treikam.
La iathuh wat la ym don ba mynsaw ha kane ka jingjia, hynrei kawei ka kali ba don u number ML 05 AC 0429 ba pyndonkam da iwei iophisar ka la julor.
La suba ba ki runar ki la kawang 2 tylli ki Petrol Bom namar uwei u petrol bom ula bthei ha kynroh ka ophis katba uwei u hap halor ka kali.
Ki Pulit ka Laitumkhrah Police Station mar ia ioh jingtip ki leit sha katei ka jaka ban pynlong ia ka jingtohkit.
Tang hadien katto katne kynta ba shah kawang petrol bom ka ophis treikam ka DMR, u Myntri Rangbah ha ryngkat u chief secretary, ki heh pulit bad ki heh sorkar ki la leit sha kane ka ophis ban jurip bad ban bud dien halor ka jingjia.
Haba kren sha ki lad pathai khubor u Director ka tnat Directorate of Mineral Resources (DMR) u Bah MB Tongper ula iathuh ba ki la ujor ar tylli ki ejahar ha Laitumkhrah Police station, khnang ba ki pulit kin leh ia kaba donkam ban ioh kem ia ki briew ba donkti kawang petrol bom.
“Kawei ka ejahar ka dei ba nga ujor ma nga kum u Director ka DMR bad kawei ka ejahar ka dei ba la ujor da iwei i ophiar jong ka tnat namar ka dei ka kali shimet ba pyndonkam ma i” la ong u Director.
Haba iathuh halor ka jingjia u Director ka DMR ula iathuh ka la jia ha ka por 3:32 nohphai sngi katba u dang don ha kamra ba don jingialang bad ka shu sawa ba pait bilor bad baroh ki dang mut ba don aksident.
“Hynrei da ngi la peit bha don ka kali ba kem ding. Ngi ioh sngew ar sien ki jingsawa ba bthei bad tang hapdeng 4-5 minit ngi la lah ban pynlip ia ka ding bad mar mar la pyntip noh sha ki Pulit, kumjuh sha u DC” ula ong.
U Director ula iathuh kane ka dei ka sien banyngkong ban kawang petrol bom ia ka ophis DMR.
Haba iathuh halor ka jingwan jurip u Myntri Rangbah, u Director ka DMR ula iathuh ba u Myntri Rangbah ula kular ban ai jingiarap sha i trai jong ka kali ba shah pynjulor bad ula kular ruh ban pynbun shuh ia ki kor CCTV Camera ban iada kum kine ki jing jia.
You may also like
-
Ngin rung BJP na bynta ka bha ka miat ki paidbah
-
Kyntait ki nongkyrshan NPP ia u Nelbi T Sangma kum u kyrtong, kynnoh ba leh ‘politik’ ki nongialam
-
17 tarik Risaw ka sngi khadduh ban pynrung kyrteng Electoral Roll, lah ban duh thep vote ki hajar ngut
-
Kiew kiba ioh pang AIDS ha Meghalaya kynthup 60 ngut ki longkmie armet
-
Ka kam ba eh tasam ban kynriah ia ki nongdie madan, ong u Conrad