Noh synniang ka APSTA da ka ‘Charity Home’ ha rakhe sngi iap u Thomas Jones

Ki nonghikai All Primary School Teachers’ Association (APSTA) bad ka Thomas Jones Memorial Celebration Committee (TJMCC) hynne ka sngi ka la rakhe ia ka lyngkhuh sngi iap ba 177 jong u Rev. Thomas Jones uba la tip kum u kpa jong ki Alphabet Khasi, ha Krissimai Mini Stadium, Smit.

Ha kane ka jingrakhe kaba iatyngkhuh ruh bad ka jingdap 184 snem ka jingdon jong ki Lower Primary Schoool ha Khasi Jaintia, ka APSTA ka la noh synniang ia ka Charity Home sha ka kong Smierda Kharsati ha shnong Mawber bad la pyllait paidbah ruh ia ka Sovenir jong ka APSTA.

Ha kane ka prokram la donlang u MLA ka Nongkrem u bah Ardent Miller Basaiawmoit, u MLA ka Mawkynrew u bah Banteidor Lyngdoh, u MDC ka Mawkynrew u bah Seiborlang Warbah, u MDC ka Nongkrem u bah Kitboklang Syiem, nalor kiwei de.

Haba kren ha kane ka jingialang u bah Ardent ula ong ba baroh ki tip ia ka nongrim jong ka Voice of the People Party (VPP) haba ia dei bad ka pule puthi ka jylla.

U bah Ardent ula ong ba ka khana jong ka jingnang jingstad ha Meghalaya kam lah ban iakhlad na ka khanatang jong ki paid Khasi bad ka jingkylla dur jong ki lyngba ka bor jong ka kyntien kaba la thoh.

“Ka jingnoh synniang jong u Rev. Thomas Jones ka pynkynmaw ia ngi iwei pa iwei ba ka bor jong ka jingnang jingstad kam shong tang ha ki kot bad ki kamra klas. Hynrei ka shong ha ka jinglah jong ngi ban pynkylla dur ia uwei pa uwei u briew ban pynkhlain ia ki shnong ki thaw, bad ban saindur ia ka lawei jong ka imlang sahlang,” ong u bah Ardent.

Ula ai ka jingiaroh ia baroh ki nonghikai Primary kiba la noh synniang ha ka jingshakri bad ka jingtrei shitom jong ki ha ka kam.

Ha kajuh ka por, ula ong ba dei ban pyntikna ba baroh ki khynnah ha ka jylla kin ioh ia ka lad ban ioh ia ka pule puthi bad baroh ki nonghikai kidei ban ioh ia ka jingkyrshan ban pynurlong ia ka thong.

“Ka 184 snem mynshwa, ka dei ka jingiaid lynti ba thymmai ka pule puthi, mynta ka dei ka kam ram jong ngi ban pyntikna ban bteng ia kane ka jingiaid lynti da ka jingkut jngmut bad ka jingiohi jngai na bynta ka lawei ka jylla,” ula onng.

Ula kyntu ba dei ban kynmaw ia ka por barim, ban burom ia ki nonghikai mynta bad ban pynlut pynsep ia ki khynnah kiban tei ia ka lawei hadien habud.