17 tarik Risaw ka sngi khadduh ban pynrung kyrteng Electoral Roll, lah ban duh thep vote ki hajar ngut

U Chief Electoral Officer (CEO) u Dr B D R Tiwari hynne ka sngi ula jingialang Video Conferencing bad ki Deputy Commissioner, District Election Officer, ERO bad AERO nalor ki nongmihkhmat jong ki seng saiñ pyrthei ban pynthikna ba ki nongthep vote ba dei hok ki dei ban rung kyrteng ha ka Electoral Roll katba ki bym dei hok kim dei ban ioh rung ha ka Electoral Roll ne ka thup kyrteng jong ki nongthep vote.

U BDR Tiwari ula pyntip na ki 21.69 lak ngut ki nongthep vote ha ka Draft Roll, la dep ban phah notis ia ki 6,51,735 ngut, kiba ioh pdiang ia ka notis ki don 6,46,397 ngut katba kiba dang sahteng ban ioh ia ka notis ki don 5,190 ngut bad lah pyndep baroh 5,36,468 tylli ki Hearing kaba long 82.31 percent na ki notis kiba lah dep ban pynmih.

U la ong, ha ka notis ka kynthup ia ki 2,22,786 ngut kiba don ha ka kyrdan ‘No Mapping’ bad 4,28,949 ngut kiba don jingduna bad jingbakla ha ka ‘Mapping’.

U CEO ula ong, “Ka jingpdiang ia ki notis kam mut ba la pynduh noh ia ka kyrteng. Kan ym don kano kano ka kyrteng kaba mih ha ka Draft Electoral Roll kaban shah pynduh noh khlem da bud ia ki kyndon treikam bad ban ai ia ka lad ba kin pynshai ialade ha ka Hearing”.

Ha kaba iadei bad ka Claims bad Objection, ka Jylla ka la ioh pdiang ia ki aplikeshon na ki 17,061 ngut hadien ba lah dep pynmih ia ka Draft Roll, kynthup ban pynrung ia ki 9,343 ngut lyngba ka Form 6, ia ki 1,076 ngut lyngba ka Form 7 bad 6,642 ngut lyngba ka Form 8 na ka jingkynriah jaka bad ka jingpynbeit ia ki jingduna.

U BDR Tiwari ula kyntu ia ki nongthep vote kiba dei hok, kaba ka kyrteng ka jongki kam shim la mih ha ka Draft Roll ba ki dei ban phah bad pyndap ia ka Form 6 bad ban pyndep ia katei hapoh jong ka 18 tarik u Nailur kaba dei ka Tarik kaba khatduh.

Ula pyntip ruh ba lah dep ban thung ia 1,814 ngut ki Booth Level Agent da ki seng sain pyrthei ban iarap ia ki nongthep vote kaba kynthup na ka NPP 736 ngut, 393 ngut na ka BJP, 320 ngut na ka VPP, 186 ngut na ka INC, 121 ngut na ka UDP bad na ka AITC 58 ngut.

Ka Claims bad Hearing kan iai bteng haduh ka 17 tarik u Risaw bad ia ka Electoral Roll kaba pura yn sa pynmih ha ka 21 tarik u Risaw.