Buh thong ka sorkar ban thaw 15 tylli ki Rehabilitation Centre

Ban pynkhlain ia ki jaka sumar kiba kyrni Drok, ka Sorkar Jylla ka la buh ka thong ban shna 15 tylli ki Rehabilitation Centre hapoh Meghalaya hapoh u snem 2025. Ïa kane la pynbna da u Myntri ka tnat Social Welfare u Bah Paul Lyngdoh u la ong nalor ki jaka sumar Sorkar, ka Sorkar Jylla ka la lah ban bei pisa ia ki Rehabilitation Centre ba la pyniaid da ki Balang bad ki riew shimet. “Ngin sa nang pynbun ia ka jingdon ki jaka sumar Sorkar lane ki Rehabilitation Centre. Ngi dang bishar ia ki jingtyrwa ban don la kumno kumno sa 15tylli ki Centre hapoh u 2025” la ong u Bah Paul.

U Bah Paul u la ïathuh ba haduh mynta ka Sorkar Jylla ka la bei pisa ruh ia 9 tylli ki Centre ba long trai bad pyniaid da ki riew shimet hapoh ka Jylla. Haba kylli halor ka jingiap ki 2 ngut ki samla na Shillong ha ki Rehabilitation Centre ha Assam, u Myntri ka tnat Social Welfare u la ong “Ngi la dep thoh sha ka Sorkar Assam. Ngi la pan ia ka kaiphod. Ka shithi ka la leit ruh na ka Deputy Commissioner ba pan kaiphod na ka tnat ba dei khmih ha Assam.

Ha kine ki khyndiat kynta ban wan, ngan sa shong bishar halor kane ka kam”.“Ha ka jingjia ba kham mynshuwa ia kaba la kynnoh shah lehbein ha Mizoram, ngi lah shimkhia bad tuklar ia ka kam. Mynta ka kyntu ruh ngi la thoh shithi bad u Principal Secretary jong ngi ula kren ia ki bor ba dei peit ka Assam” u la ong.