Bym pat don surok, pulom ka jingthmu khring nongjngohkai ka thaiñ Bangla Sohphie

Ka shnong Bangla Sohphie lem bad ki para marjan ki don ki jaka kiba itynnad ithiang ban peitkai kiba khlem artatien, kin khring bad tan ia ki nongwankai ban leit peitkai, hynrei kane ka jingthmu ka shnong, ka dang sahkut namar bym don ka surok kaba biang. Ka thain Bangla Sohphie kaba hap ha Sohiong Block, East Khasi Hills ka don ki kshaid kum kum ka Kshaid Khudoi, ka Kshaid Thup thup, ka kshaid Kohmang nangta ka jaka peit shynna ne view kaba ioh lut sha them wat ia ka sor Shillong. Ha kane ka shnong ka don ruh ka jaka sah u David Scott hyndai bad u diengsohphie uba ju shongthait u David Scott bad ki nongbud jongu ha ki spah snem ba la leit ha ka por ba ka ri Bilat ka wan hiar thma ia kane ka ri Khasi. Ka don ruh ka khana ki kulai lieh jong u David Scott ha kaba ka don ka jingiathong hyndai hapdeng ka thain Bangla Sohphie bad ka thain Mawphlang. Ka jingiathong ka long ba lada u kulai lieh uba buh ha ka thain Bangla Sohphie un im, kan long sor hynrei lada u iap, kan duh noh iaka jinglong sor bad namar ba u iap noh, ia ka sor la pyllong noh sha ka thain Mawphlang kaba dei ka Shillong mynta.

U Rangbah shnong ka shnong Bangla Sohphie u bah Albinus Mawlong ula iathuh ba ka shnong ka la leit ai jingthoh ha ka ophis BDO Sohiong ban thawlad ban iarap ia ka jingdonkam hynrei khlem pat ioh kano kano ka jubab haduh kine ki sngi. Ka shnong Bangla Sohphie ka dei kaba im da ka rep ka riang ha kaba jan baroh ki nongshong shnong ki dei ki nongrep bad ka shnong ka pyrshang ban thaw lad ban phaikhmat sha ka kam jngohkai khnang ban kyntiew ia ka ioh ka kot jong ki nongshong shnong. Ka shnong ka la khreh ban pdiang ia ki nongwankai kiba wan sha shnong da ka akor ka burom khnang ba kan long ka jingmyntoi ia ki nongshong shnong.

Kawei ba ka shnong bad ka seng Meghalaya Youth Federation (MYF) Bangla Sohphie unit, kynthup u President bah Arius Basaiawmoit bad Secretary bah Sherbestar Kharthangmaw, ki la sngew donkam palat, ka long ban pynbha noh ia ka surok u David Scott na katei ka shnong kaba iaid lyngba shaduh Umsning, ka Ri Bhoi bad kan iaid lyngba ban poi sha ka ksaid thup thup hynrei ka la sahteng haduh mynta. Ki la ai jingthoh sha u symbud myntri rangbah bah Prestone Tynsong ba peit ia ka PWD ha ki snem ba la leit hynrei kim pat ioh jubab eiei na ka sorkar halor kane.