Basngewnguh ïa ki shipai pynlong ka DC da ka Bike Rally

Ka ophis jong ka Deputy Commissioner, East Khasi Hills District, kala pynlong ia ka ‘Bike Rally’ kum ka dak ban sngewnguh ia ki shipai jong ka ri kiba la shakri ban iada ia ka Ri. Ia kane ka jingthmu la lamkhmat da ka Deputy Commissioner ka Kong R.M. Kurbah, ban ai jingithuh ia ka jinglen lade bad ia ka jingtrei shitrhem jong ki shipai. Kane ka bike rally kala sdang na Golflink, ha kaba u Additional Deputy Commissioner u Bah Shanborlang Warjri ula kaweh ia ka lama bad la pynkut pat ia kane ka bike rally ha State Central Library, Shillong.

Haba ai jingkren ha ka jingialang ka Kong RM Kurbah kala ong, ba kane ka prokram kadei kum ka dak ban ai jingkyrshan ia ki shipai kiba la donbynta ha ka jingiakynad bad ka ri Pakistan bad kala pynpaw ba ka jingjia kaba dang shen ha Pahalgam kadei ka dak jong ka jingpynkynmaw ia ka jingshlur bad ia ka jingaiti kaba la pyni da ki shipai ka ri. “Ka jingshngain bad ka jingsuk kaba ki paidbah ki ioh leh sngewbha kadei namar ka jingaiti jong ki shipai. Ka ri ka ieng tylli kawei ha kaban pynpaw ia ka jingsngewnguh. Kadei lyngba ka jingbym thiah bym dem ka jongki ba ngi ioh pat ma ngi ban thiah suk” la ong ka DC.

Ka la pynpaw ruh, ba ka sorkar kan ai ia ka jingkyrshan kaba pura bad watla ki shipai ki don ha kano kano ka jaka ruh kim shym la shah ieh pat marwei bad kum ki paidbah jong ka ri India, ki don ryngkat lang bad ki bad ngin ieng tylli lang bad ki shipai. Ka la pynpaw ia ka jingkyrmen ba kan mih kaei kaei kaba bha bad ka pynpaw ia ka jingskhem jingmut halor ka jingjop jong ki shipai jongka Ri.