Phah pynkynriah ïa ka eksamin CUET na ka bynta kiba ngat shabar Jylla

Ka Sorkar Jylla ka la thoh shaka National Testing Agency (NTA) ban pynkynriah ia ka eksamin Common University Entrance Test (CUET -UG) jong ki samla pule ka Meghalaya, kiba la shah pynngat ban ialeh ia ka eksamin sha kiwei pat ki Jylla ka Ri India. Ïa kane la pyntip da u Myntri ka tnat Pule Puthi u Rakkam A Sangma u la ong baka NTA ruh kala phah ktien shaka Sorkar Jylla ban pynbiang sa 200 tylli ki kor Computer khnang ban pynlong iaka eksamin CUET. Haba kren sha ki lad pathai khubor u Rakkam u la kubur ba ki don shisha katto katne ngut ki samla pule kiba ioh jaka (Centre) sha Port Blair, Jharkhand bad kiwei kiwei ki Jylla ka Ri hynrei hadien ka jingtuklar u Myntri Rangbah, ka NTA ruh kala phah ktien shaka Sorkar Jylla ban ialeh ban pynkynriah iaki jaka thoh eksamin.

“Ngi lah phah ia ka shithi kaba tyngeh sha ka NTA hynne ka sngi, ba ka dei ban pynkynriah ia baroh ki eksam na ka bynta ki khynnah ka Jylla, kiba la shah pynngat ban leit ialeh ia ka eksamin sha ki jaka kiba jngai bha na la ka jong ka Jylla. Ngi lah dep bthah ia ka tnaT pule puthi ba kan iakren bad kitei ki khynnah kiba la shah ktah” la ong u Rakkam. U Rakkam u la ïathuh ba ka NTA kala phah ktien shaka Sorkar Jylla ba kan sa pynlong ia ka jingjurip ia ki jaka (Eksamin) ba la dep ban ithuh daka Sorkar hapoh Meghalaya.

U Myntri u la pynpaw ruh baka Sorkar Jylla kala ban jur ia ka jingdonkam ka NTA ban thung ia u Nodal Officer uba pura ha ka Jylla. “Ka NTA ka lah dei ban pyntip ia ka Sorkar Jylla ha ka por kaba biang, khnang ba ngin lah ban shim ia ki sienjam bad ba ki khynnah pule kin ym mad ia kino kino ki jingeh” u la ong. U la kynnoh ba kine ki jingeh kila mih biang ha ka Jylla Meghalaya namar ba ka jingpulom jong ka NTA ban iakren bad ka Sorkar Jylla.