Bym pyntreikam Entry & Exit Gate ka pynsuk ban rung shapoh Meghalaya: HNYF

Ka Hynñiewtrep National Youth Front (HNYF) kala kynnoh ba ka jingbym treikam ki Entry bad Exit Gate ka pynsuk iaki briew ban rung shapoh Meghalaya. Kane ka jingkynnoh ka HNYF kadei hadien ba ki kam poh jong ka Sonam Raghuvanshi ka ba la pyniap iala u kurim u Raja Raghuvanshi haki thaiñ Sohra kala sdang paw pyrthei. Haba kren shaki lad pathai khubor u nongialam ka HNYF u samla Tyllibor Swer u la ong ba ka seng ka pynrem bad ban dawa pan map na kito ki briew kiba kynnoh ba ka jylla Meghalaya ka dei ka ba Jylla ba jyllei ki kam sniew. U samla Tyllibor u la pynpaw ba ha ki por ba ka seng ka pynlong ka jingkhynra ia ki nongwan jngohkai pyrthei ha Umtngar ka seng ka la mat shibun ki jingshah kynnoh bad shah kynthoh hynrei ka seng ka la pynpaw ba kan iai bteng ban khynra ia ki briew ki ba wan na bar.

U la ong ba ka HNYF kam pyrshah ia ka Tourism ne iaki nongjngohkai pyrthei hynrei ka pyrshah namar ka Jylla kam don iaki kyndon ban pyrkhing iaka jingrung ki briew shapoh ka Jylla. U samla Tyllibor u la ong ba ka Jylla Meghalaya ka la don ka aiñ ka ba dei ka MRSSA, ha kaba ha ka Section 18 (E) jong kane ka aiñ ka kdew ba Entry bad Exit point kiba don ki dei ban lum jingtip ia ki briew ki ba rung ba mih hapoh ka jylla Meghalaya, hynrei ka Sorkar Jylla haduh mynta kam lah ban pyntreikam ia ka MRSSA.

“Ha ka kyrteng jong ka jingwan jngohkai ki wan sha ka jylla Meghalaya, hynrei kine ki briew ki pynmih ia ki jingshah kynnoh kaba ymlah ban pdiang ia ka jylla Meghalaya” u la ong. Haka juh ka por ka HNYF ka phah ia ka khubor sha ka Sorkar ba ka dei ban peit pyrman bha ia ka jingwan rung kyrthep ki nongwan jngohkai pyrthei, la ka jingwan jong ki ka dei thik tang ban wan jngohkai pyrthei ne ban wan ban buhai shnong.