Ka jingkieng jri ar-mala ka long ka ksiar ïa ka shnong Nongriat

Ka jingdon ka jingkieng jri ar mala ne double decker ha ka shnong Nongriat kaba don sha them sha ka jaka kaba long sharing, kaba long riat kaba don tang kumba 40 tnum iing eiei, ka la long ka par ksiar ban ai jingmyntoi ia ki nongshong shnong.  Ha ka jinghiar lum khubor sha kane ka shnong, la ioh ruh ban iakren ia ki nongshong shnong haduh katno bad kumno kane ka jingkieng jri armala ka la ai jingmyntoi shisha ia ki. Na ka jingdon kane ka jingkieng jri armala, ka shnong Nongriat ka la rung ha ka map jong ka pyrthei, kaba la khring ia ki nongwankai pyrthei na kylleng ki jaka, ym tang na ka ri India hynrei satlak ka pyrthei. Ki briew mynta kila im na ka kam jngohkai ha kaba ki don kiba buh homestay, kiba buh dukan, kiba die fast food, kiba buh restaurant ruh.  Ha jaka kaba don ha ka jingkieng jri hapdeng ka shnong, la iohi ba ym tang ba ki nongwankai ki ioh ban lehkmen ban iaid ha ka,  hynrei ki lehkmen ruh ban sum ban jngi ban shongkai pynngad na ka jingkhuid ka jingsngur ka wah.

Ka la don ka jingring ksai mynta ban pyllong ia katei ka jingkieng jri sha ka lai mala khnang ba kan khring shuh shuh ia ki nongwankai.    “Mynshwa haba ym paw pyrthei kane ka jingkieng jri, ki briew ki duk bha hynrei dei na ka jinglap u phareng uba wan kai, uba leit iathuh sha uwei u rangbah u bah Denis ha Lairyngew ia ka jingdon kane ka jingkieng bad u bah Denis ula wan hiar sha katei ka shnong, ban pynpaw pyrthei ia kane ka jingkieng jri”, la ong i kong Bih Sohkhlet. Ka la iathuh ba ki briew kila ioh ban kamai ban pynbha ia ka lynti syngkieng, ia ki iing ki sem lyngba ka kamai na ka jingwan ki nongwankai ne tourist.

Katba Iwei i kong ba die jingbam ne fast food, ila iathuh ba ka jingwan ki tourist ka la iarap bha ia I, ban ioh kamai ban iarap ia u lok uba shu leit bylla. Ka jingdon katei ka jingkieng jri, ka lah dei shisha kum ka par ksiar ia ki nongshong shnong ka Nongriat, kaba don ha kyndon bah namar ba hap ban iaid kjat na Tyrna ne na Mawlakhiat ban poi sha kane ka shnong.La iohi ba da ki spah ki nongwankai kila tuid sha kane ka shnong bad katkum ka jingiathuh ki nongshong shnong, ym duna ia ka 500 ngut man ka sngi, ki tourist kila wan ban iuhkjat ha katei ka jingkieng jri ar mala.