Bym rah ïa u Mangalsutra bad sati, Lap ksai ki pulit ba donkti ka Sonam ban pyniap ia u Raja

U DIG (Eastern Range) Davis NR Marak ula ong, ka jinglap ia u Mangalsutra, ka sati bad kiwei ki ksiar ka ai ksai ia ki Pulit ban thwet ia ka Sonam Raghuvanshi ba ka donkti lang ha ka kam pyniap ia u lok u Raja Raghuvanshi. Lah ban kdew ka jingngeit ki Hindu ka kynthei hadien ba la iathoh, kam ju law ia u Mangalsutra na ryndang. Haba kren sha ki lad pathai khubor u Davis NR Marak ula ong, ba ka jinglap ki Pulit ia ka metiap jong u Raja Raghuvanshi ha ka 2 tarik Jylliew bad ia ka wait ha ka 3 tarik, ka la pynlong ia ki Pulit ban suba ba ka Sonam ka donkti lang ban pyniap ia la u lok. U DIG ula kubur ba ka Sonam ka la phla ba ka don bynta ban isuh buit bad ka kynhun nongpyniap briew ban shim ia ka jingim u Raja. Ula iathuh ki Pulit ki la suba ba ka Sonam ka lah ban donkti lang ban pyniap ia la u lok, namar hadien ba la buddien ia ki Rynsan Social Media jong ki shikurim, ki Pulit kim lap satia ba kin shondur ne ban Post ia ki dur jong ki ar ngut wat la ki wan shangkai pyrthei (Honeymoon) sha Sohra.

“Hooid, ka (Sonam) la phla ba ka don bynta ha ka jingiasuh buit hynrei ka jingkylli mano ba suhbuit nyngkong eh ka dei kaba donkam ban hap pynshisha na ba ka (Sonam) la kynnoh ia u Raj katba u Raj ula kynnoh ia ka Sonam” la ong u Davis NR Marak. Haba iadei bad ka jingkam ba ka Sonam ka la kular ban siew T.20 lak sha ki nongpyniap briew, u Davis ula ong “Kane ka dang don ha ka jingtohkit bad kane ka dei kaba ngi kynnoh ia kine ki nongshah suba mynta kumta ngam pat lah ban batai eiei halor kane ka bynta”. “Ia kane ngin dang pynthikna lyngba ka jingtohkit bad haba pynshong nongrim ia ki jingbatai jong i, ngin sa pynshisha ia kaei kaba ka ong bad hadien kane ngin sa lah ban ong katno lane ha kano ka rukom la pyniaid ia ka jingsiew pisa” u la bynrap. U DIG ula pyntip ia baroh ki nongshah kynnoh yn sa ialam sha Sohra ban pynwandur biang ia kane ka kam bymman hadien ba la dep ka jingtohkit.

Halor kawei pat ka jingkylli la ki Pulit kin pan jingmut na iingkashari ban pyndonkam ia ki Lying Detector (Kor ba kem ia ki jingkren thok) ha ka jingtohkit pyrshah ia kine ki nongshah kynnoh, u DIG ula ong “Nyngkong eh hadien ba ki la ai ia ki jingbatai, ngi hap ban pynshisha ia ka. Lada ki ong ba ngi la leh ia kane lane ngi la leit sha kata kata ka jaka, ngi hap ban leit pynshisha hi da lade la kine ki jingbatai ki iahap ne em-kane ngin hap leit ban pynshisha ia ki jingbatai jong ki”. U heh Pulit ka Jylla ula iathuh kin pan jingiarap ruh na ki Pulit ka Guwahati bad na kiwei ki Jylla lada donkam ia ka jingiarap jong ki. Ula iathuh ka jingtohkit ka lap ba lai tylli ki scooty la shim wai na Shillong-ka Scooty ba pyndonkam ka Sonam bad u Raja la pynieng ha Sohra Rim bad la ioh kurup da ki Pulit. Ki Pulit ki dang tohkit haba iadei bad ki artylli kiwei pat ki scooty ba la pyndonkam da kine ki 3 ngut ki nongpyniap briew.