Bynniaw ka KSU ba sahdien ka thaiñ Mawkyrwat ha ka jingkhuid

Ka KSU Mawkyllut Unit ka la pynpaw ia ka jingsngewkhia bad jingsngewsih kaba khraw halor ka jingleh bym suidniew bad ka jingsahdien ka jingmut jingpyrkhat jong ki paitbah ka thaiñ Mawkyrwat ha kaba iadei bad ka khuid ka suba bad ka jingsumar ia ka mei mariang. Kane ka jingsahdum ha ka jingmut jingpyrkhat jong ki paitbah ka thaiñ Mawkyrwat ka la paw tyngkrein̈ hynnin ka Sngi Ba-ar ha kaba ki dkhot ka KSU Mawkyllut Unit ki la hap ban leit pynkhuid ia ka Wah Sala ha Mawpon kaba hap hapoh ka shnong Mawkyrwat na ka daw ba ki briew ki bret pathar ia ki jakhlia kiba kynthup ia ki plastic, ki nep jot, ki jingsop khyllung (huges) bad kiwei kiwei ki jakhlia ba i saitmet haduh katta katta.

U General Secretary ka KSU Mawkyllut Unit, u samla Bennison Shangdiar ha ka kyrwoh u la ong ba kane ka jingpynjakhlia ka la jia watla ka Dorbar Shnong Mawkyrwat ryngkat ka KSU ki la ju maham na ka por sha ka por ia kiba wan saitjaiñ ha kane ka Wah ba kim dei ban bret ia ki jakhlia hynrei kine ki briew ki leh kum ki bym don skhor.”Kane hi ka pynpaw ba ki briew ki sngewtynnad ban pynkhuid tang ia ka met bad ka ïing lajong, bad kheiñ dewthala pat ia ka mei mariang da kaba ki bret pathar ia ki plastic, ki nep jot bad kiba bun ki jakhlia ki bym pyut ha ki lum ki wah,” ong u samla Bennison.

U samla Bennison u la kynthoh ruh da kaba ong, “Ngi ju ong ka khuid ka suba ka dei u thied ka jingkoit jingkhiah, hynrei lada ka long ha kane ka rukom kumno ngin ïoh ia kata ka jingkoit jingkhiah haba kane ka Wah kadei ka tyllong um bam um dih ia kiba bun tylli ki shnong ha ka thaiñ Mawkyrwat. Ka suk palat ban shu bret lyngkar ïa ki jaboh jabaiñ. Ynda la sniew bad iwtung lut ki slum, kumno phin leh?” Kumta ka KSU ka kyntu jur ïa ki paitbah ban ñiewkor bad sumar khuid ïa ka Mariang, khamtam eh ïa ki tyllong um.