Wat pynbor ia ka KSU ban khynra nongbylla bar jylla, kyndang ia kiba sah be-aiñ ha Mahadev Khola bad Maxwelton Estate

Ka Khasi Students’ Union (KSU) hynne ka sngi, ka la leit kynduh ia u Chief Secretary ka Jylla Dr Shakil P Ahammad ban dawa ban pyntreikam ia ka Amendment jong ka Meghalaya Identification, Registration (Safety & Security) of Migrant Workers Act, 2020 bad pynkylla ia ka rukom treikam ha ki District Selection Committee, ka bhah kam ha NEIGRIHMS, ban weng noh ia ki jingbthah ia ki khynnah skul ban rwai “Vande Mataram” bad ban kyndang noh ia kiba be-aiñ ha Mahadev Khola bad Maxwelton Estate. U General Secretary ka KSU u samla Donald V Thabah bad u samla Reuben Najiar Asst. General Secretary bad Chairman jong ka Employment Monitoring Cell ka KSU, ki la pynpaw ha ka dorkhas halor ka rukom thungkam ha NEIGRIHMS. Ka KSU ka la pynkynmaw ba la pynlong ka jingiakhih khlem buh por ha NEIGRIHMS ban dawa ia bhah kam ba 80:20 ki kynthei bad shynrang ha ka kam Nurse bad ban pynbeit thymmai ia ka bhah kam na bynta ki riewlum kiba dei ki trai ri trai muluk bad ia ka Recruitment Examination dei ban pynlong ha NEIGRIHMS. Ka seng ka la sangeh ka jingiakhih hadien ba ka sorkar jylla hapoh ka jingialam u Myntri sorkar u Bah Paul Lyngdoh ryngkat bad ki heh ophisar kum ka Deputy Commissioner, East Khasi Hills District, u Superintendent of Police East Khasi Hills bad ki bor pyniaid ka NEIGRIHMS ki la kular ia ka KSU ba kin pynurlong ia ka jingdawa hadien ka jingiakren pynbeit bad ka Ministry Health & Family Welfare ka Sorkar India. Ki nongialam ka KSU ki la dawa ban shim khia mardor khnang ba ka jingshakri ka NEIGRIHMS kan ym don jingktah ne noh shiliang.

Ka KSU ka pynpaw ka sorkar jylla ka la wanrah ka jingpynkylla ia ka Meghalaya Identification, Registration (Safety & Security) of Migrant Workers Act, 2020, hynrei la 2 snem tam mynta kam shym la pyntreikam ia kane ka ain bad ka la byrngem lada ka sorkar ka dang pynslem ka seng kan hap ban bteng biang ban kyndang ia ki nongbylla ba wan na bar jylla.Ki nongialam ki la pynpaw ia ki jingdkoh ha ka rukom treikam jong ka District Selection Committee bad ka seng ha ka 24 tarik u Risaw 2024 ka la ai dorkhas sha ka ophis u Chief Secretary ban pynthikna ka jingthungkam kan long kaba khuid ka bym shah liang iano iano, hynrei kaba lyngngoh ka sorkar kam shym la pdiang satia ia ki jingai jingmut ka seng. Ka jingai jingmut ka kynthup ia ka jingpynbna ia ka ‘Cut Off Marks’, Answer Key, ka jingpynbna ne jingpyllait ia ki Marks ba ioh ki nongiakhun eksam, Carbon Copy jong ka OMR Sheet, ban pynduh ia ka Personal Interview bad kiwei ki jingdawa. Ka jingpynbna Result ki DSC ha ki District kam pat biang ki dang don bun ki jingduna bad ka lah ban long na jingshah liang bad bam sap. Ka la maham lada ym don ka jingpynkylla ha ki DSC ka KSU kan shim ia ki sienjam ban pynlong jingiakhih ha nongbah Shillong bad ha ki District ki bapher bapher.

Ka KSU ka la pynrem ruh ia ka jingbthah jong ka Directorate of Arts & Culture ba ki khynnah skul ki dei ban rwai bad rekod ia ka jingrwai “Vande Mataram” ha skul.Ka seng ka pyrshah jur ia ka jingbthah namar kane ka jingrwai ka kren shaphang ki Blei Hindu, ka bym ia hap satia ban pynbor ban rwai ia baroh ki jait niam ha ka ri ba don baroh ki jait niam bad lada ka Sorkar ka dang pynmih ia ki jingbthah ka Seng kam banse ban shim ia ki sienjam ba tyngeh. Ka KSU ka kyntu ia u Chief Secretary ban bthah ia ki bor ba dei peit ban pynkloi ban phah ia ka kaiphod pura halor ki ar tylli ki jaka sorkar bad ban kyndang noh ia kiba sah be-aiñ ha kitei ki jaka ha Mahadev Khola bad Maxwelton Estate. Kane ka dei ka jingdawa ba la slem ba ka seng ka la iai pynkynmaw ia ki bor sorkar hynrei haduh mynta kim shym leh eiei.