Khlain ki rynsan Social Media ban ialam bakla ia ki paidbah

U nongialam ka NPP u bah Prestone Tynsong ula ong ba dang ha kine ki ar lai sngi ula sdang pei skhor ba ka jingkhlain bor ka Social Media ka long jubor eh haduh ba ka lah ban ialam bakla ia ki paidbah ka jylla.
U bah Prestone ula ong ba ha ka 23 tarik Nailur u leit sha Delhi bad tang ha ki katto katne kynta la saphriang ka khubor lyngba ki rynsan social Media ban u lem ki 22 ngut ki MLA kin leit iasoh noh sha ka party BJP.
“Nga leit ha ka 23 tarik bad u Symbud Myntri u bah Sniawbhlang bad u Myntri Rangbah u wan ha ka 24 tarik Nailur. Ngi iadon jingialang bad ki heh ha Delhi. Hynrei mih ki khubor kiba laiphew jait haduh ba la duh thiah duh dem,” ong u bah Prestone ha ka jingialang ialap ilekshon MP shiteng samoi ka NPP ha shnong Wahlyngkhat, Pynursla Constituency.
U la kam ba ka jingshah rem ha ki ilekshon ba long ha u snem 2024 bad 2025, kadei namar ka Social Media.“ Nga sngewthuh bad pei skhor mynta ba pleng ka Social Media ka la ialam bakla shisha ia ki paidbah ka jylla. Ki iajop ilekshon pleng tang na ka jingpynsaphriang ia ki khubor ba thok ha ki Social Media,” la ong u bah Prestone.
Ha kajuh ka por ula ther tyngeh ia ka Voice of the People Party (VPP) kaba la kular ban wanrah ka jingkylla ha District Council, hynrei phewse ka wanrah pynban da ki ain ban pynduh bor ia ki Rangbah shnong, ki khlieh nongshynshar bad ki Riti ki Dustur.
“U Paidbah ula ai bor ia ka VPP ban shynshar ha KHADC bad kaba la kular ban wanrah jingkylla ha ka synshar paidbah.Haduh mynta ym pat iohi jingkylla eiei, hynrei ka jingkylla ka long pynban ban pynduh bor ia ki Rangbah shnong,” la ther u bah Prestone.
Ula ong ruh ba kane ka jingleh jong ka VPP ban pynduh ia ka bor jong ki Nongialam bad ki bor shnong bor thaw ka lah ban wanrah jingma kaba khraw ia ka imlang sahlang.
“Haduh ba phi da pynduh noh syndon ia i bynta i ba ong ba dei ban da pan jingmut ne iasyllok bad ki Dorbar shnong ne ki dorbar raid lane ki dorbar Hima,” la ong u Bah Prestone.
U Bah Prestone ha kane ka jingialang u la kyrpad ruh ia ki paidbah ka Pynursla konstiwensi ba kin ai ka jingkyrshan jong ki ha ka elekshon MP shiteng samoi ia u DRL Nonglait bad ban pynjop don burom ia u khnang ba ka party kan lah ban shakri kham bha ia u paidbah.
“Sngewbha wat pynlehrain ianga ha kane ka ilekshon MP kaban sa long. U Dr DRL Nonglait udei u riew rangbah uba kup ia ka jingsngewrit bad ka jingtip briew tip blei bad da ka burom akor,” ong u bah Prestone.
Katba na ka liang u MLA ka Mawhati u bah Charles Marngar ula ong ba ula wan khnang na Mawhati sha Wahlyngkhat ka Pynursla ban ai khublei khnang ia ki paidbah ka Pynursla konstitwensi.
U bah Charles ula ong ba u ai khublei ia ka jingstad, ka jingproh, ka jingtylli jong ki paidbah ban jied ia u bah Prestone ban ioh ia u nongialam kaba long ka jingkyrkhuh ia ka ri Bhoi.
Ula iaroh ia u bah Prestone da kaba ong ba u dei u nongniah lieng uba tbit ban poi sha ka thong bad um ju kop.
Ha kajuh ka por ula kyntu ia ki paidbah ban jied ia u briew uba don soh, ym uba shu jrong bad heh tang ki nia khlem seisoh eiei.