Ki nongtrei Muster Roll ka Jylla hapoh ka shatri jong ka All Jaintia Muster Roll Workers & Labour Union (AJMRWLU) hynne ka sngi ki la byrngem ban mih surok namar ka jingkuman ka Sarkar halor ki mat jingdawa jong ki. Ki nongtrei Muster Roll naduh ki snem ba la dep ki la dawa na ka Sorkar ban pynkiew ia ka Variable Dearness Allowance (VDA) bad ban ithuh ia ka rta shongthait ki nongtrei Muster Roll hapoh ka Jylla. Ki la dawa na u Myntri Rangbah ka Jylla Conrad K Sangma ban khot iakren halor ki mat jingdawa lada ka Sorkar kam kwah ba ki nongtrei Muster Roll kin mih surok ban iakhih.
Haba kren shaki lad pathai khubor u Adviser jong ka Joint Action Committee (JAC) ka AJMRWLU u Bah Khro L Pariat, ula iathuh ka Union ka la phah haduh 5 tylli ki dorkhas sha u Myntri Rangbah hynrei haduh mynta, ka Union kam pat ioh kano kano ka jubab. U Bah Pariat ula iathuh ka jubab ba ka Union ka ioh na u Myntri Rangbah ka long ba ki nongtrei Muster Roll ki dei ban long kiba iai shah. Ula kynnoh ka Sorkar Jylla haduh mynta kam pat pyntreikam ïa ka Labour Code 2025, ka ban ai jingmyntoi ïa ki Muster Roll bad ia ki nongtrei bylla sngi hapoh ka Jylla.
“Ngi sngew lyngngoh ba naduh u Naiwieng 2025, ka Sorkar jylla Meghalaya kam shym la ai kano kano ka jingpynbna ban pyntreikam ïa ka Labour Code ha Meghalaya” la ong u Bah Pariat.U Bah Pariat ula ban jur ba ka jingleh mynthi ka Sorkar ka ktah ïa ka jingim ki nongtrei Muster Roll, kiba ïakhun pyrshah ïa ka jingkiew dor ki marbam mar dih hapoh ka Jylla. Ka AJMRWLU ka pynpaw ruh ïa ka jingsngewkhia halor ka jingbym pyntreikam ka Sorkar Jylla ïa ka Employee Provident Fund (EPF) bad ka jingbymlum jingkheiñ ia ka dor ki marbam mardih wat la ka Sorkar India ka la pynhiar ïa ka GST ha ki marbam.