Byrngem shong kyllaiñ mungor u Dr Mukul ba shah set tulop ki nongtrei GHADC

U Nongialam ka Liangpyrshah u Dr Mukul Sangma hynne ka sngi ula byrngem ban leit shim bynta lang haki program iakhih bad ki nongtrei ka Garo Hills Autonomous District Council (GHADC). Lah ban kdew ba naduh 7 tarik Naitung ki nongtei ka GHADC kila sdang daki program jingiakhih ban pyrshah halor ka jingshah shah set tulop kaba la iaid mynta kumba 43 bnai. Hashuwa kane u Nongialam ka Liangpyrshah u Dr Mukul Sangma ula ialam iaki MDC ka GHADC ban iakynduh ia u Lat ka Jylla u CH Vijayashankar ban pynsngew halor ka jingeh ba ki nongtrei bad ki dkhot (MDC) ka Council ki iakynduh namar ka jingshah set tulop kaba la iaid mynta la 43 bnai.

Haba kren shaki lad pathai khubor u Dr Mukul Sangma ula ong ba ka jingleh mynthi ka Sorkar haba iadei bad ka jingeh ba ia kynduh ki nongtrei bad ki dkhot (MDC) ka GHADC kala pynbitar ym tang iaki paidbah ha Rilum Garo Hills hynrei ha baroh kawei ka Jylla. U Dr Mukul ula iathuh ba watla ki nongtrei kila sdang iakhih naduh 7 tarik Naitung hynrei haduh mynta ka Executive Committee (EC) jong ka GHADC bad ka Sorkar ki dang leh matlah namar haduh mynta ki dang sngap mynthi. “Kane ka jingsngap jar ka Sorkar bad ka EC jong ka GHADC ka pyni iaka jingbym don jingkitkhlieh bad ka jingbym kwah ban leh iaka ka kamram kumba la bynshet da ki bor ba dei khmih bad kane kan sa pynkhihwin iaki paidbah ka Jylla khamtam na Rilum Garo Hills” la ong u Dr Mukul.

U Dr Mukul ula ong ba lada ka Sorkar kam shimkhia halor kane, kan pynlong ia u ban lum iaki paidbah ka thain Garo Hills ban leit kyrshan lang iaki nongtrei ka GHADC haki program iakhih. Naka liang u MDC ka Kharkhutta constituency u Cherak W Momin ula iathuh ba ka jingwan kynduh ia u Lat ban phah tuklar halor ka jingshah set tulop ki nongtrei ka District Council, ka jingshah pynsangeh lane pynwai kynsan iaka Dorbar Kyrpang kaba 14 bad bthah iaka Sorkar Jylla ban mynjur iaka Garo Customary Law.