La 6 sngi ym pat lap ïa ka met u samla ba ngam jyllop ha ka pung Umiam

Wat hapdeng ka jingtreishitom bad ka jinglen lada da ki bor pulit ngam um lem bad ka jingiarap na ki bahaiing ba hasem bad ki paralok parajor, hynrei tad haduh mynta ka sngi kaba hynriew ym pat lah satia ban lap ne ioh tam ia ka met u samla Pynskhem Kharkrang u ba la ngam jyllop ha ka pung Umiam hajan ka Jack Well area ka jaka jong ki shipai Military.

Katkum ka jingiathuh da u Rangbah Shnong ka Umroi Nongrah, la ong ba u ne u samla u la leit kai bad la ki paralok bad leit jngi ha katei ka pung Umiam ha ka sngi Saitjaiñ hynrei sniewbok u la ngam jyllop noh bad jah rngai naduh kane ka sngi bad mar ia ioh jingtip marmar ki bor shnong lem ki bahaiing hasem bad ki bor pulit ki la leit marmar sha katei ka wah ban pynlong ia ka jingiawad ia u ne u samla. La iathuh ruh, ba na ka liang ki bor pulit ka Umiam bad Umroi lem bad ki pulit ngam um ka SRDF kaba kynthup ia ki 3 kynhun ki la pyrshang ban ngam ha kane ka wah ban wad ia ka met jong u Pynskhem hynrei haduh mynta la kynjoh sha ka 6 sngi ym pat lah satia ban lap ia ka met.

Watla, ki bahaiing ki la duh noh ia u ne u samla hynrei ki ap khmieh lynti bad kyrmen skhem ba ki pulit lem bad kiwei ki lad jingiarap katkum ka juk kaba mynta kin lah ban lap bad ioh sei ia ka met jong u Pynskhem khnang ba kin ioh pat ban leh ia kaba donkam ban pynkhuid ia ka met, la bynrap ruh ba ki bahaiing lem bad ka Dorbar Shnong ka la ai Khublei kyrpang ia baroh kiba la don bynta lang ban wad ia ka met jong u Pynskhem.