Da ka bos shong u Conrad bad ki ophisar sha shnong Siej

U Myntri Rangbah ka jylla u Conrad Sangma ryngkat ka myntri ka koit ka khiah ka kong Ampareen Lyngdoh bad u myntri ka tnat PHE u Marcuise N Marak lem ki ophisar jong ki tnad bapher bapher ki la shong da ka bos bad iaid na jingkiengjri ban leit jngoh ia ka shnong Siej, kaba hap hapoh Shella Bholaganj Block ha East Khasi. Katei ka jingleit jngoh, ka long shibynta ka jingialang jong ki myntri sorkar ba ar sngi ha Sohra, East Khasi Hills. Ka jingialang ka kynhun myntri, ka la buh nyngkong ka thong na bynta ka jingroi bad jingkiew jong ka Jylla ha u 2032, ha kaba ka jylla Meghalaya kan dap 60 snem ka jingioh Jylla pura. Ka jingleit treking sha shnong Siej ka long ban sakhi ia ka jingkieng Umkar Living Root bad ban iakynduh ia u bah Hally War, u nongshna ia ka jingkieng jri ba im da kaba thain. Haba kren u Myntri Rangbah ka Jylla ula pynbna ka jingangnud ka sorkar ban pynneh pynsah ïa ki riti dustur barim bad ban pynbha ïa ki jingtei ha ka thaiñ. Haba kren sha ki nongshong shnong u Myntri Rangbah ula pynpaw ïa ka jingdonkam jong ka jingkiengjri ne Living Root, ka long kaba kongsan ia ka kolshor jong ka thaiñ palat 300 snem mynshwa. Ka jingkieng ba kyrpang, kaba la shna da ki kpa tymmen ka shnong, ka long ka dak jong ka jingtei kaba neh bad ka roi ka par ha ka imlang sahlang.”Ka jingstad ki kpa tymmen jong ngi ka la pynlong ïa ngi ban thaw ïa ka jingkieng jri ba itynnad bad kaba treikam,” u la ong bad ula bynrap, “Ka long kaba phylla kumno ka shnong ka ïatylli ban pynneh pynsah ïa kane ka dustur, ban pynthikna ba ki pateng kiba dang thymmai kin nang ban rah ïa ka shakhmat.

“U Rangbah shnong u bah Hally War u dei u briew uba la pynwan dur ha lyndet jong ka jingkieng jri tynrai ha Shnong Siej, ula sdang ban thain ia katei ka jingkieng naduh u khynnah samla bad u la shakri ia ka shnong kum u nongsynshar la jan 40 snem. Haba kren shaphang ka jingaiti jong u ia ka jingim ban pynneh ia ka jingtei ula ong, “Ha ka rta kaba 10 snem eiei, nga la iohi ia ka jingeh ba ki briew ki iakynduh haba ki iaid lyngba ia ka wah. Ka la pynpaw ha nga ba dei ban leh ia kaei kaei kaba iaineh. Ka jingmut ka la wan na ki kmie ki kpa jong nga, kiba la ïasam ïa ki khana shaphang ka jingkhlain jong ki tynrai kiba im.” U Myntri rangbah ula iaroh ia ka jingpyrshang ban pynneh ia katei ka jingkieng jri bad ula kubur ia ki jingeh ba ki paidbah ki iakynduh ban pynneh pynsah ia kane ka buit shna jingkieng jri kaba la rim bha. “Kane ka projek ka pyni ia ka jingshaniah bad ka jingaiti kaba donkam ban thaw ia kaei kaei kaba lah ban neh. Ka long ka jingpynshisha ia ka jingstad kaba la pynsah lyngba ki pateng,” la bynrap u myntri rangbah.Ha kane ka jingleit jngoh, u myntri rangbah ula pynbna ruh ia ki projek pynroi thymmai ban pynbha ia ka jingpyniasoh ha kane ka thain, kynthup ia ka jingshna ia ki surok thymmai bad ka jingpynbha ia ki iing skul.

“Ka sorkar ka shimkhia ban weng ia ki jingdonkam jong ki nongkyndong,” u la ong. “Ngi la rai ban ai mang pisa ban shna surok ban iarap ia ki nongrep bad ki nongshong shnong bad ki jaka pule ban pynthikna ba ki pateng ban wan kin ioh ia ki lad jingpule ba kham bha.”U Myntri Rangbah ula kren ruh shaphang ka jinglah ban kyntiew ia ka kam jngohkai pyrthei ha kane ka thain. Ki nongshong shnong ki la pyntip kumba 10,000 ngut ki nongshangkai pyrthei ki wan jngoh ia ka jingkieng jri ne Living Root ha shnong Seij man u snem.”Ngi ithuh ia ka jingdonkam ka kam jngohkai pyrthei na ka bynta ka jingroi ka ioh ka kot ha ka thain,” la bynrap u myntri rangbah.“Ka tnad jngohkai pyrthei kan shimkhia ia ki jingdonkam ban pynroi bad ban pynneh ïa ka mariang bad ka kolshor jong ka thaiñ.”