Da ka jingiatreilang bad ka Assam, ka Byrnihat ka la ioh lyer khuid bad lait na ki jaboh

U Member Secretary ka Meghalaya State Pollution Control Board (MSPCB) u Dr. GH Chyrmang ula iathuh ba ka Byrnihat, Ri Bhoi mynta ka la ioh ia ka lyer ba khuid bad kam hap shuh ha ka thup kyrteng kum kawei na ki jaka ba jaboh ka tam ka lyer ha ka pyrthei. Kum ban shu kdew dang shen, ka lyer ha Byrnihat ka la paw kum kawei na ki jaka kaba jaboh tam ym tang ha India hynrei ha ka pyrthei bad kane ka la ktah ia ka jylla Meghalaya kaba ju bna nam kum ka jylla kaba jyrngam. U Dr. Chyrmang ula ong ba ha kine ki khyndiat bnai ka kyrteng jong ka Byrnihat ka la shah pynbudnam sniew kum ka jaka kaba jaboh tam ka lyer ha ka pyrthei, hynrei mynta kane ka jingshah pynbudnam ka la jah na ka thup kyrteng bad mynta ka la wanphai biang ka jinglong ka lyer kaba khuid.

Ula ong ba ka jinglah ban pynjah ia ka jingjaboh ka lyer ha Byrnihat, ka dei lyngba ka jingiatreilang hapdeng ka Meghalaya bad ka Assam namar ba kine ki jylla ki don ki karkhana baroh ar liang bad lada kam don ka jingiatreilang, kan shem jingeh ban pynkhuid ia ka lyer jaboh. “Da ka jingiatreilang ka Meghalaya bad ka Assam, kam don shuh ka Byrnihat ha ka thup kyrteng kaba jaboh tam ka lyer. Mynshwa haduh mynshem snem, ngi la ioh kyrdan ba nyngkong ha ka jingjaboh tam ka lyer ha Byrnihat hynrei mynta ka la jah”, la ong u Dr. GH Chyrmang.

Ha kajuh ka por, u la ong ba ka MSPCB ka donkam ban pynkhlain namar ba kumba ka long mynta, ka don ka ophis tang ha Shillong bad ka shem jingeh ban leit mareh shane shatai kylleng ka jylla na ka jingbym don ki ophis. Ula iathuh ruh ba mynta ki dang phah sha ka sorkar na ka bynta ka jingdonkam ban buh ia ka ophis ha East Jaintia Hills bad kawei ha Tura, West Garo Hills khnang ban pynkhlain ia ka rukom treikam ka Board.