Da ka rally rakhe World No Tobacco Day ka Alpha English HSS

Ki nongpynïaid ka Alpha English Higher Secondary School lem bad ki khynnah skul ki la rakhe ia ka World No Tobacco Day da kaba mih paidbah ban iaid rally shibynta ban pynphriang ia ka khubor halor ka jingma na ka jingdih duma ne bam duma, ia kane ka rally la sdang na compound jong ka skul bad iaid pat shaduh sha sor Nongpoh ban pynkut biang hapoh katei ka skul.

Ha kane ka jingiaid paidbah ban pynphriang ia ka khubor halor ka jingma jong ka jingdih duma bad kiwei kiwei ki jingdih ba la khleh lang bad u duma, ki khynnah skul ki la rah lang da ki placard bad poster ban pyni ia ki dur bad jingthoh ba shyrkhei na ka jingshah ktah ka koit ka Khiah na u duma. Haba kren hashwa ban sdang ka jingiaid paidbah, ka Kong WK Blah, Principal ka Alpha English Higher Secondary School, ka la ong, ba ia kum kane ka programme kaba kyrpang la ju pynlong man ka snem hapoh skul bad ruh ban ai jinghikai kyrpang ia ki khynnah ban kiar na kine ki jingdih duma ne bam duma kiba ktah shikatdei ia ka koit ka Khiah ia kito kiba pyndonkam ia kine ki jingdih.

Ka la ong ruh, ba bun na kito kiba ju pyndonkam ban dih duma ne bam duma ki la ngat ha ki jingpang jingshitom kiba shyrkhei bad ka long kaba kongsan ban hikai lem ia ki khynnah bad ki paidbah ban kiar na kine ki jingdih duma bad ban pyrkhat ia ka koit ka khiah jong u wei pa u wei u khynnah skul ne ki riew paidbah.