Da ka School Meal Program pynlong ka NESFAS-DSEL

Kum shibynta ban shim ïa ka sienjam kaba kongsan ban pynthikna ïa ka jingbha jingmiat jong ki khynnah pule, ka NESFAS ryngkat ka jingïatreilang bad ka DSEL, Meghalaya kala pynlong ia ka School Meal Program ha ka  19 tarik u Naiwieng, 2024, ha Laitsohpliah Community Hall ha kaba la ïadonlang ki nongïalam shnong, ki nonghikai, ki kmie ki kpa bad ki riew shemphang. Shwa ban sdang ka prokram, ki nongïashim bynta ki la leit jngoh ïa ki kper skul jong ka Laitsohpliah bad Subakalai, ha kaba kila ïoh ïa ka jingmut shaphang ka jingpyntreikam ïa ki kper skul. Kine ki kper kim dei tang ki tyllong ba lah ban ioh iaki  jhur kiba khlem dawai na ka bynta ban pyndap ha ka ban bam ja sngi ia ki khynnah hynrei ka long kaba kordor ha kaban ai jinghikai ia ki khynnah. U Bah Pius Ranee, Executive Director ka  NESFAS, ula ai ia ka jingtip kyllum halor ka bam ka dih ka rep ka riang tynrai da kaba ban jur halor ka roi ka par jong ka mynta khlem da pynthut noh iaka lawei da kaba ong, “Ki khynnah ki don ka jingtip halor ka spah mariang lyngba ki nonghikai kum i Babu Nestar i ba don ka rukom ai jinghikai kaba kyrpang  da ka ba ialam iaki khynnah sha khlaw ban pynithuh iaka spah mariang bad ka sawdong sawkun ha ryngkat ki rangbah kiba don ka jingstad tynrai .” Ula ong ba kane ka School Meal program ka long kaba kongsan namar ba ki shnong ki dei ki nongshimbynta ba ha khmat eh. Kylleng ka pyrthei ki don ruh iaka ka thong ba ha u snem 2030 baroh ki khynnah skul ki dei ban ioh iaka bam kaba tei met. Namar kata ula kyntu jur ruh ba ngi dei ban ia shim bynta lang ban ioh ia katei ka thong haneng khamtam eh haka jylla Meghalaya.

Babu Nestar Kharmawphlang, Head Teacher jong ka  Laitsohpliah school, ula pynshai ba ka School Meals ba lah sdang daka NESFAS ka dei ban ia leh pyrshah ia ka jingpangkhrew bad ki kper skul kim dei tang ba ka iarap ban pynioh iaka bam ja sngi kaba bha hynrei ka ai ruh ka lad ba ki khynnah kin don ka jingiadei ba jan bad ka mariang. U Swapnil Tembe, Director jong ka DSEL, ula ai khublei ïa ka NESFAS bad ki nonghikai skul halor ka jingpyrshang ban kyntiew ïa ka jingbam ba tei ha ki skul, ha kajuh ka por ula ai ruh ka jingkular ba ka sorkar ka long kaba kloi ha ka ban ai ka jingkyrshan ïa kum kine ki jingthmu khamtam ia ki kper ha ki skul ka long ka ba kongsan tam ba baroh ki skul ki dei ban don. “Kane ka rukom iatreilang ka long kaba donkam bha na bynta ka jingjop kaban iai bteng bad ba neh. Nga ngeit ba da kaba pyniar ia kine ki jingthmu bad pynbha ia ki jingbam, ngi lah ban pynbha shuh shuh ia ka jingbam jong ki khynnah skul jong ngi bad ban ialeh pyrshah ia ki jingeh kiba kongsan ha ka iadei bad ka  koit ka khiah kum ka jing pangkhrew ka met bad ka jingduna snam” ula ong.

Ka jingthmu jong kine ki prokram ka long kum ka sienjam ba don jingkyrmen ban thaw ia ka lawei kaba phyrnai na ka bynta ki khynnah skul. Da kaba pynbiang ïa ki jingbam kiba tei met bad pynroi ïa ki rukom bam kiba lah ban neh, ka School Meal Program ka long ka sienjam kaba kongsan ha kaba pynkupbor ïa ki jingmut jingpyrkhat kiba dang samla bad ban tei ïa ki imlang sahlang kiba koit ba khiah. Ia ka jingialang la pynkut da ka ba ia bam ja sngi lang ha skul  da  ka ba pyni ruh ia ki jingbam kiba tei iaka met bad ba la pynkhreh da kaba pyndonkam da ki jhur ba ioh na ki shnong.