Da kaba pynsum pynsleh la pynskhem ïa u Syiem Maremdor

Ki riew tymmen riewsan ryngkat ka jingdonlang ka Syiem Sad, ka Costlymai Syiem ka Hima Sohra, ki Myntri hynne ka sngi ki la hiar sha ka shnong Nongbah Mawshuit ban pynskhem, pynsum pynsleh ia u Syiem Maremdor Syiem kum u Syiem ba pura jong ka hima Sohra.Ha kane ka sngi, ryngkat ka jingsakhi lang ki paidbah ka Raid Mawshuit, ki sordar, ki paidbah, ki Riew tymmen Riewsan ki la pyndep ia ka jingleh ia ka niam ka rukom hadien la pynphong jain spong kum u Syiem. Hadien ba ladep ka jingleh niam, u Paiem Marremdor ula nguh ia ka Raid Mawshuit bad baroh ka 12 Shnong baroh kiba la pynskhem, pynsum pynsleh ia u kum u Syiem katkum ka riti dustur.

Haba kren ha kane ka sngi, u Syiem ula pynthikna ba un sei ka bor bad ka buit ban ai ka jingsynshar kaba khuid, kaba khlem shaliang iano iano na ka bynta ban pynbit pynbiang ia ka Hima. Ula khot ia ki khun ki hajar ba kin ai jingmut ai buit ia u, kumno ban pynbha ia ka synshar khadar hapoh ka Hima.

Ia u Marremdor la jied bad la pynskhem ka dorbar hima hadien ba la mynjur lang baroh na ka iing ka sem khlem kano kano ka jingialeh pyrshah, ba un kiew sha ka khet syiem ka Hima hadien ba la khlad noh u syiem Freeman Sing Syiem ha ki bnai ba la dep.La ioh ruh ia ka jingkren na u myntri Nongrum, u Secretary ka Hima Sohra bah BV Rymmai, u Secretary ka Raid Mawshuit bah Kyntiew Khongshei, ha ka jingdon lang u sordar bah Jling Shrieh bad kiwei kiwei. Dang shen, ka KHADC ka la thung Acting ia u Myntri ka Hima u bah Mynjurlang Majaw jong ka Hima Sohra, da kaba kyntait ban ai sanad ia u syiem Marremdor.