Dang bishar ka sorkar Jylla Ia ka jingdawa kyntiew T.1 klur ka Bond ia ki samla pule MBBS

Ka Myntri ka tnat ka koit ka khiah ka Kong Ampareen Lyngdoh hynne ka sngi ka la pyntip ba ka jingtyrwa ban pynkiew ia ka Bond T.1 klur ia ki samla ba pule MBBS na ka bhah Sorkar ka la dang hapdeng ka jingbishar bniah ka Sorkar Jylla. Kane ka jingkren ka Myntri Sorkar ka wan hadien ka jingdawa ka Hynniewtrep Youth Council (HYC) ban leh tyngeh pyrshah ia ki samla pule MBBS ba bei tyngka ka Sorkar, ki bym shym la wan phai ban ai ka jingshari ha jylla hadien ba ki pyndep ia ka jingpule.Lah ban kdew ba ka HYC ka la ai jingmut ban pynkiew ia ka bond haduh T.1 klur ka ban sdang treikam naduh ka samoi pule u snem 2026-27.Haba kren sha ki lad pathai khubor ka Kong Ampareen ka la ong, “La ngin kyntiew ne em ia ka Bond jong ki samla pule MBBS na ka bhah Sorkar ka dei ka kam kaba ngi dang shong bishar mynta”.

Ka Kong Ampareen ka la pynpaw ka jingkyrmen ba ka Sorkar kan bishar bha ia kane ka kam bad ban shim ia ka rai ka ban ai jingmyntoi ia ka Jylla bad ia ki nongshong shnong.Ka la ban jur ba ka jingiatai halor ka Bond bad ka jingpynbor ia ki doktor ban soi ia ka bond katkum ka ain kam dei satia kaba dang thymmai bad ka la iaid la bun bun snem. Ka la bynrap ka Sorkar ka la mad ia ki jingeh namar ba ki doktor hadien ba ki la pyndep ia ka jingpule na ka bhah sorkar kim wan phai shuh ban shakri ha jylla.Hynrei, da ka jingpynkha ia ka Meghalaya Medical Registration Council, ka jinglong jingman ka la kham bha namar ki samla pule ki donkam mynta ban register bad ka State Board hadien ba ki pyndep ia ka jingpule MBBS” ka la ong.

Ka Myntri ka la pynpaw ka pisa jong ka bond la pynkiew ha ki snem ba la dep. “Hooid, ha kawei ka por ki samla pule ki hap ban siew T.34-35 lak bad na kane la pynkiew sha ka T.40-45 lak bad u nombor ula nangkiew hynrei ngi iohi ba ki samla pule kim patiaw satia ban iasoi ia ka Bond. Ka dei ka kam ba sngewkitram ban btin lynti ia ki samla pule ka Meghalaya” ula ong. Hynrei ka la ban jur ba ka jingpynleit jingmut ka dei ban long ka jingpynshlur ia ki samla pule ba kin wanphai sha la iing bad shakri ia la ki jong ki briew ha ka jaka ba kin sngewkitram na ka pisa. Ka Myntri ka la pynpaw ia ka jingkyrmen ba ka Sorkar kan bishar bha ia kane ka kam bad ban shim ka rai ka ban ai jingmyntoi ia ki nongshong shnong bad ka Jylla.