Dap ram ki Kontraktor ba pyntrei skhim JJM bym siew bill ka sorkar

Ka All Jaintia Contractor and Supplier Association (AJCSA) ka la kynnoh ba naduh 2019 haduh 2025, ki Contractor kim pat ioh ia ki Bill haba ia dei bad ka jingpyntreikam ia ka skhim sam um Jal Jeevan Mission (JJM) ha Rilum Jaintia. Haba kren sha ki lad pathai khubor u President ka AJCSA u Bah Welcoming Langi ula iathuh ba ka mang tyngka ban pyntreikam ia ka skhim JJM ha Rilum Jaintia ka dei T.2,50,74,96,005.00 kata T.1,71,15,08,618.00 na ka bynta ka RWS Jowai Division bad T.79,59,87,387.00 na ka bynta ka Electrical Division, Jowai jong u snem mang tyngka 2024-2025. U Bah Welcoming ula iathuh haduh mynta ka Sorkar ka la pyllait tang T.1,13,14,07,563.00 na ka bynta RWS Jowai Division bad T.47,01,86,864.00 na ka bynta ka Electrical Division, Jowai.

Ula iathuh na ka T.2,50,74,96,005.00, ka Sorkar haduh mynta ka dang pyllait ia ki Bill tang 1,60,15,94,427.00. “Ngi pynpaw ia ka jingsngewkhia ba jur namar ba ka jingpynslem ban siew bill. Bun na ki Contractor kiba pyntreikam ia ka skhim JJM ki la hap ban shim ram ban pyndep ia ka jingtrei. Kane ka la buh jingeh ia ki contractor” la ong u Bah Welcoming. U Bah Welcoming ula ïathuh ba ki Contractor ki la iakynduh bun sien ia u Chief Engineer (CE) ka tnad PHE ban bud dien ia kane ka kam, hynrei ka jubab ba ki ioh ka long ba ka Sorkar Pdeng kam pat pyllait ia ka pisa.

U President ka AJCSA u la ong ba ban pynthikna la ka Sorkar Pdeng ka la pyllait ne em ïa ka pisa jong ka skhim JJM, ka Association kan sa wad jingtip da ka Right to Information (RTI) ban lap ïa ka jingshisha namar kim ïoh ïa ka jubab kaba shai na ka Sorkar Jylla.