Ther u bah Ardent ia ka sorkar bym lah tehlakam nongdih drok, kthong ia ki nongtyrwa die sha ha PB

Ki nongialam ka Voice of the People Party (VPP) hynne ka sngi ki la hiar sha ka Khyndailad ban iakynduh ia ki nongdie sha nongdie soh ha kriah kiba la shah beh ha ki bor ka Shillong Municipal Board (SMB). Ha kane ka jingiakynduh, u President ka VPP u bah Ardent ula sngap ia ka jingud jong ki bad ula kylli pyrthew ia ki, la ki pynwit ne em ia ka iaid ka ieng jong ki. Ki paidbah ki la pynsngew ba kim shym la pynwit hynrei ki la iaid bad tyrwa ia ki jingbam jong ki.

Hadien ba u la sngap ia ki jingpynsngew jong ki, u bah Ardent ula ai mynsiem ia ki nongdie ban ki dei ban iaid beit shakhmat ban tyrwa ia ka sha ki soh, ki jingdie jong ki namar ba ki khlem pynwit ia kiwei kiba iaid ba ieng ha kane ka jaka ha Khyndailad. “Iaid beit tyrwa beit, lada ka sorkar ka kwah ban mih jingkulmar ka mat khang ia phi,” la ai mynsiem u bah Ardent. U bah Ardent ha kane ka sngi, ula ong ia ki nongtrei ka SMB ba ki dei ban leit noh sha ophis bad ban rah ktien sha ka sorkar ba ‘u bah Ardent um shah ban shu leh donbor, lym kumta kan don ka jingeh’.

“Ngam lah shah shuh ban peit ia ka jingshah leh bein ki briew barit jong ngi. Nyngkong ngim kwah ban tuklar, hynrei mynta ka la long palat namarkata ngi hap ban mih ban tuklar,” ong u bah Ardent. Ula ong ba ia kiba die drok ka sorkar kam lah ban leh eiei hynrei ka kthong tang kiba rit ba ria ba kamai jakpoh da kaba iaid tyrwa bam ha lynti.