Dawa ka AGHAWHF ban kyntiew kam ia ki Senior Graduate Anganwadi

Ka All Garo Hills Anganwadi Worker & Helpers Federation (AGHAWHF) kala thoh sha u Myntri Rangbah ka jylla Conrad K Sangma ban phah tuklar halor ka jingslem ban kyntiew kam ia ki Senior Graduate Anganwadi Worker. Lyngba ka shithi ka AGHAWHF kala pynkynmaw ïa u Myntri Rangbah halor ka dorkhas bala phah naduh 2 tarik Jylliew 2023, ïa kaba la Federation kala kdew shai ban kyntiew kam ia ki Senior Graduate Anganwadi Worker, ka jingthung Contract ia ki Lady Supervisor bad ka jingdawa ban ailad nyngkong ia ki Senior Graduate Anganwadi Worker kiba la trei lypa ia ka kam ban shah kyntiew kyrdan. Ka Federation kla ong ba ka Dorkhas (Memo), kala buh ia ki kyndon ban kyntiew kyrdan Senior Graduate Anganwadi Worker, kadei kaba khlem shym la pyntreikam satia ka tkum ka por kaba la buh.

“Ka jingpynslem ban pyndep ia ki jingbthah jong ka Memo kala pynmih ia ka jingeh kaba khraw hapdeng ki nongtrei, kiba la trei shitom ha ka jingai jingshakri lyngba ka rukom treikam jong ka Anganwadi la bun phew snem. La pynmih ia ka memo da ka jingthmu ban ai mynsiem bad ban ithuh ia ka jingnoh synniang kaba kordor jong ki Senior Graduate Anganwadi Worker. Kine ki nongtrei kiba don ryngkat ia ka jingnang jingstad bad kiba la shakri bun snem, kila pyni ia ka jingaiti kaba kyrpang ha ki kam jongki. Hynrei, wat hapdeng ki jingbthah kaba shai kdar kaba la kdew ha ka memo, kam shym la don ka jingtreikam bha ban pynthikna ha ka ban kyntiew kyrdan ïa ki nongtrei kiba dei hok katkum ka por ba la buh” la ong ka shithi jong ka AGHAWHF.

Ka AGHAWHF kala pynpaw ba ka jingpynslem ban pyntreikam iaka Memo bala phah naduh 2 tarik Jylliew 2023, ym tang ba ka iuhroit ïa ka jingpyrshang jong ki nongtrei hynrei ka pynmih ruh ka jingsngew bynniaw bad ka pynduh jingkyrmen ia ki. Ha kaba iadei bad ka jingthung da ka kontrak ia ki Lady Supervisor, AGHAWHF kala ong ba ka jingbym don ki kyndon kiba shai kdar ban thung ia ki Lady Supervisor kala wanrah ia ka jingsngew ka bym hok ia ki nongtrei Anganwadi kiba la don lypa.

Leave a Reply

Your email address will not be published. Required fields are marked *