Ka seng Congress kan ym ailad satia ia ki saw ngut ki MLA kiba la shu phet jyndat na ka Congress ha u snem 2024 bad kila dawa na ka Meghalaya High Court ban mait kyrteng ia ka jinglong MLA jong ki. Haba kren sha ki lad pathai khubor u Secretary ka Meghalaya Pradesh Congress Committee (MPCC) u Bah Manuel Badwar bad u Bah Kynpham V. Kharlyngdoh u Chairman ka Legal Cell, kila ong ba ka Congress haduh mynta ka dang buddien ia ki 4 ngut ki MLA kiba kynthup ia u Bah Ronnie V. Lyngdoh, Bah Celestine Lyngdoh, Bah Gabriel Wahlang bad u Bah Charles Marngar kiba la phet seng bad leit ban pyniasoh sha ka National People’s Party (NPP) ha u Nailar 2024.U bah Manuel ula ong, ba ka seng kala leit ujor sha Meghalaya High Court, hadien ba kam hun bad kam pdiang ia ka rai u Lamphang uba pynksan ia ka jingleit iasoh ki saw ngut ki MLA sha NPP bad kila kynnoh ba u Lamphang ula shim rai khlem bishar bniah ia ka aiñ katkum ka aiñ phet seng ha ka 10th Schedule.
U bah Manuel ula ong, ba katkum ka aiñ kyntiap seng ne ka Anti Defection Law ka jingmih seng kadei ban poi 66 percent bad ka jingmih jong kitei ki MLA kam shym la kot kumba la buh ha katei ka aiñ.Ula ong ba ka seng kala phah ka jingujor sha u Lamphang hynrei ka jubab ba ki iohpdiang na u (Lamphang) ka long ba dei ban ujor tang u MLA ym da ki dkhot ka party.“Halor kano ka rukom u Lamphang u pdiang ia ka jingphet seng jong ki namar ba kam pat poi ia ka 66 percent. Ngi sngewthuh ba u Lamphang um don ka nongrim kaba skhem hynrei u shu shna tang ban shu pynjlan ia ka kes jong ki,” ong u bah Manuel. Halor kane, ula ong ba ka mukotduma kaba dang don ha ka iingkashari kala iaid shakhmat bha bad la dep pynlong kumba 4-5 sien ka jingtian bishar.
Ula ong ba kane ka sienjam ba ka party ka shim, ka long khnang ba nangne shakhmat ki MLA kiba kyntiap seng, kam dei ba ki leh ban pynsniew ne beh thong ia kaei kaei ka bym don jingmut. Hynrei ka long ba nangne shakhmat kino kino ki MLA haba ki jop na ka party ba ki iakhun, kim dei ban ialehkai ia ka party bad kim dei ban pyrkhat tang ia ka jingmyntoi shimet namar ki paidbah haba ki jied kim jied ia u briew shimet hynrei ki peit ruh ia ka party.U bah Kynpham ula ong, ba ka Congress kan iai iakhun beit ia kane ka kam, wat haduh ban da poi ha Supreme Court khnang ba ki paidbah kin ioh ia ka hok.