Dawa ka CoRP ia ki bor district ban pynbeit mardor

Ka Confederation of Ri Bhoi People CoRP sengkmie ha ka 25 tarik Naitung ka ai jingthoh sha u Deputy Commissioner Ri Bhoi District ban pyntreikam ia u Pin code na Meghalaya ha ki shnong kiba dang pyndonkam ia u Pin code na Assam haduh mynta. Ha ka dorkhas la pynpaw ka seng ka la ioh ka jingujor na ki samla pule ka thain kiba kynduh jingeh haba apply online ha ki jaka pule ne ki scholarship ha jylla, namar ka pincode ha ka EPIC ne Aadhaar card ka dei na Assam bad don ruh kiba shah kyntait ban plie account ha ki bank namar ka jingbakla ka pincode bad kane ka buh jingeh ia ki paidbah ka thain Ri Bhoi sepngi bad kiwei ki shnong ba pyndonkam ia u pincode 781131 na Assam.

Kumta ka CoRP ka kyntu ia ki bor district bad ki bor pyniaid ka post office Nongpoh ban pynbeit noh mardor bad ban pyntreikam ia u pincode na Meghalaya ban lait na ki jingjia kulmar hadien. Namar ym lah ban tip ia ki kam buit poh ka Assam ka lah ban kam wat ia kitei jaka ha ka jingiakren pynbeit pud hapdeng ka Meghalaya bad Assam kaba dang iaid shakhmat mynta namar ka jingpyndonkam bakla ia ka pincode. “Ka shnong Patharkhmah ba hap hapoh hima Nongkhlaw bad ka Head Quarter jong ka Western Ri Bhoi Civil Sub Division katkum ka pincode ka hap hapoh Assam bad kumjuh ka New Jirang bad Old Jirang ki shnong ba heh hapoh hima Jirang, kumta kane ka jingbakla ka lah ban ialam sha ka jingkulmar hadien lada ki bor ba dei peit kim shimkhia ban pynbeit kloi” la bynrap.

Ha kajuh ka por ka kyntu ia ki Rangbah shnong ka thain ban shimkhia ban pynbeit noh ia kane ka kam na bynta jingbit jingbiang ki paidbah ki nongshong shnong ka thain Ri Bhoi sepngi. Kane ka long katkum ka kyrwoh ba la phah da u Bah Gershome Hat Vice President bad bah Markus Makri Genl. Secretary ka CoRP Sengkmie.