Dawa ka JAC ki 22 Shnong ban shna surok na Syntumaw sha Umdohkha

Ka Joint Action Committee (JAC) jong ki 22 Shnong Ri Bhoi District hynne ka sngi ka la dawa na u Symbud Myntri Rangbah ba khmih ia ka Tnat PWD (Road) u Bah Prestone Tynsong ban shna surok thymmai Syntumaw sha Umdohkha. Ka JAC ba kynthup 22 Shnong na Ri Bhoi District la ialam da u MLA Mawhati bad MLA Nongpoh u Bah Charles Marngar bad u Bah Mayralborn Syiem ha ka jingdonlang ki Rangbah Shnong ki 22 tylli ki shnong. Haba kren sha ki lad pathai khubor u Bah Mayralborn ula iathuh ka jingdawa surok thymmai ka dei ban pyniasoh ia ka Mawhati bad ka Nongpoh constituency bad ban kyntiew ia ka roi ka par hapoh ka thain.

U Bah Mayralborn ula ong ba kane ka surok thymmai ba ka JAC ka dawa na ka Sorkar ka kynthup ban shna Jingkieng ba paka ha ka wah Umsiang ha ka Shnong Pahamdingngan. “Kum ki nongmihkhmat ka thain Ri-bhoi District lyngba ka jingkwah ki nongialam Shnong jong ki 22 tylli ki shnong ngi la aiti da ka Dorkhas sha u Symbud Myntri Rangbah ba khmih ia ka Tnat PWD (Road) ban shna surok thymmai ba 10 km na Syntumaw sha Umdohkha kynthup ka Jingkieng ha wah Umsiang ha ka Shnong Pahamdingngan na ka bynta ka jingmyntoi ki 22 tylli ki shnong bad kiwei ki shnong ba marjan” la ong u Bah Mayralborn.

U MLA ka Nongpoh ula ong, ba kane ka surok thymmai kan long ka jingkyrkhu ia ki paidbah ka thain namar kan pyniasoh ia ki 22 tylli ki shnong ban leit iew, skul, ki jaka sumar bad kiwei kiwei. Ula bynrap ka jingbymdon surok ha kane ka thain ka buh jingeh ia ki paidbah khamtam ha ka por slap kaba buh jingeh ia ki paidbah ha ka leit ka wan bad ka kit ka bah.