Dawa ka MDC ryngkat ka synjuk Rangbah shnong ban kyntiew kyrdan PHC ia ka Umshaken Sub Centre

Ka Synjuk ki Rangbah shnong Raid Mathan Mylliem Syiemsyip, Ri Bhoi hapoh ka jingialam ka MDC ka kong Rona Khymdeit hynne ka sngi ki la dawa ba ka sorkar jylla ka dei ban shimkhia ban kyntiew kyrdan noh ia ka  Umshaken Sub Centre sha ka Public Health Centre (PHC). Haba kren sha ki lad pathai khubor u Secretary ka Synjuk u bah Davidian Mangu, ula ong ba hapoh kane ka Raid ki don 13 tylli ki shnong bad ki paidbah ki don ka jingangnud ba kin ioh noh ia la ka jong ka PHC ha katei ka thain namar haduh mynta ki dang hap ban beh shaduh Umden, PHC ban ioh ia ka jingsumar. “ Nga kyrmen ba ka sorkar kan shimkhia ia ka jingdawa jong ngi kaba la sahteng naduh mynshwa, khnang ban lah ban ai ka jingshakri kaba paka sha ki 15000 ngut ki paidbah jong ka thain baroh kawei ,” ula ong.

Na ka liang u Lyngdoh ka Raid Mathan u bah Rojis Mangu, ula ong ba ia kane ka Sub Centre la ioh naduh u snem 1984 hynrei haduh mynta kaba sngewsih ka long ba kane ka dang sahkut kumjuh khlem pat lah ban pynkiew kyrdan. Ula ong ba na ka liang ka Raid ka la pynbiang ia ki dulir bad ka la ai sngewbha ruh ia ka jaka sha ka sorkar na bynta ban buh ia ka Sub Centre bad ka la pynmang ruh ia ka jaka ba kham heh na bynta ban pynieng ia ka PHC. Katkum ka jingong u Lyngdoh,  ki paidbah ki la donkam ia ka PHC namar ba haduh mynta ki dang iakynduh jingeh ban ioh ia ka jingsumar kaba biang bad ka buh jingeh khamtam ki longkmie kiba armet, nalor ka jingbym biang ka surok.

Ha kajuh ka por, ula iathuh ba haduh mynta ha kane ka Sub Centre kim pat don tang kawei ka Ambulance ne ka kali ban kit dawai dashin hynrei ki hap ban kit da ki kali ba shu buh ki briew.