Dawa ka MKA ban kynthup ia ka ktien Koch ha ki skul Lower Primary

U Myntri Rangbah ka Jylla u Conrad K Sangma hynne ka sngi u la iashim bynta ha ka jingialang pynhap pyrda ia ka 56th Annual Koch Conference kaba la long ha Belbari, South West Garo Hills district.

Ia ka jingialang ba lai sngi la sdang ha ka 12 tarik u Rymphang bad la pynkut hynne ka sngi da ka jingiashim bynta ki nongialam shnong, ki nongshah khot sngewbha bad ki dkhot jong ka jaidbynriew Koch na kylleng ka thain bad ha kane ka prokram ka Meghalaya Koch Association ka la ai ia ka dorkhas ha u Myntri Rangbah ka jylla.

Haba kren ha ka jingialang, u Myntri Rangbah ka Jylla u Conrad K Sangma ula pynpaw halor ka jingriewspah ka rilum Garo ha ka jingdon ia ki jaidbynriew kiba don ia ki kolshor, riti dustur bad ki niam bapher.

U Conrad ula ban jur ba man ki jaidbynriew ki la noh synniang na ka bynta ka jingkiew bad ka roi ka par jong ka thain da kaba buh hakhmat ia ka bha ka miat jong ka jylla.

“Wat hapdeng jong ka jingdon ia ki jaidbynriew bapher, hynrei ngi dei hi na kajuh ka jylla bad na kajuh ka ri bad kane ka jingiatylli jong ki jaidbynriew bapher ka dei ka jingkhlain kaba khraw tam” la ong u Conrad bad ka bynrap ba ka sorkar ka la iai bud beit da kaba ai kyllum ia baroh bad ka iengskhem ha ka jingkular ban burom bad ban kyrshan ia baroh ki jaidbynriew.

U Conrad ula ong, ka sorkar ka la iai bteng ban ai jingkyrshan ia ki jaidbynriew bapher na bynta ban tei ia ki jingtei bapher, ban kyntiew ia ka kolshor, ban pynneh pynsah bad ban don ruh ia ki prokram ban sam mar kylliang ia ki jingtip.

U la kubur ia ki jingeh ba mad da ki ritpaid bad ula ong, ba ka sorkar ka sngewthuh ia ka jingsngewkhia jong ki bad bynrap ba ki jaidbynriew Garo, Khasi bad Jaintia ki dei kiba heh paid ha ka jylla, ki dei pat ki ritpaid hapoh jong ka ri, kumta ka long kaba kongsan ban iada ia ka bha ka miat jong baroh ki kynhun.

Halor ki mat ba la pynpaw ha ka dorkhas, u Myntri Rangbah ula kren halor ka jingtyrwa ban kynthup ia ka ktien Koch bad ula pynthikna ba ka sorkar kan sa khmih bniah ia kane ka mat. Ula pynpaw ba ka jylla ka dei ka iing ia kiba bun tylli ki jaidbynriew, kaba kynthup ia ki Hajong, Rabha, Koch bad Maan bad ula ban jur ia ka jingdonkam ban pdiang ia ka jingangnud jong baroh ki kynhun bad ban ioh ia ka jingmynjur da kaba iasyllok lyngba ki jingiakren.

Haba kren halor ka jingpyndonkam ia ka ktien Garo bad Khasi ha ki District Selection Committee Examination, ula pynshai namar ba ka ktien Garo bad Khasi ka lah dei lypa ka Associate Official Language, kumta ka long kaba donkam ban pynthikna ba ka rukom iakren bad ka jingai jingshakri kan long kaba iaid beit.

“Ka Eksam DSC na ka bynta kano kano ka kyrdan kan ym dei ka ban leh lut baroh ha ka Garo ne Khasi. Kan don tang kawei ka ‘Qualifying Paper’ ha Garo ne Khasi, kan shong ha ka district ia kaba ki nongleh ia ka eksamin ki aplai”.

U Myntri Rangbah ula pynshlur ia ki samla Koch ba kin shim kabu ia ki lad kum ia ka Chief Minister’s Research Grant ban pynurlong ha kaba ia dei bad ka jingpule ka jong ki.

Ka dorkhas kaba la ai da ka Association ka la pynpaw ia ki katto katne ki mat jingdawa, kaba kynthup ban ai jingmynjur ban pynlong ia ka ktien Koch kum ka ‘Medium of Instruction’ ha ki Lower Primary Level ha ki jaka kiba shong basah ki Koch hapoh jong ka National Education Policy 2020 ban pynneh pynsah ia kane ka ktien kaba la sdang ban duhjait bad ban kyntiew ia ka pule puthi.

Ka la dawa ruh ban don ia ka jingpynjynsur ia ka jinglah ia ka ktien ha ka jingaikam aijam bad ban ioh ban pule ha ki jaka pule ia ki dkhot jong ka jaidbynriew Koch tad haduh ba ki la don ia ki jaka pule kiba la biang pura.

Ki la kyrpad ban thung ia u nongialam shnong kum u Chairperson jong ka Village Employment Committee ha ki jaka rithor ban pynkhlain ia ki shnong ki thaw ha ka jingpyntreikam ia ki prokram ban kyntiew ia ka thain nongkyndong.

Ka la kyrpad ruh ban pyniar bad ban pynkhlain ia ka jingshngain jong ka Koch Boys’ Hostel ha New Tura, kaba kynthup ia ka jingtei ia ka kynroh ban tei ia ka jaka pynlong ia ka jingialang bad Cultural Hall ha Belbari ban kyntiew ia ka jaidbynriew bad ia ki kam ba ia dei bad ka kolshor.

La pynphuh pynphieng ia ka prokram da ki jingrwai bad ki jingshad tynrai ban pynpaw ia ka jingriew spah ka jingdon jingem naduh hynthai ki jaidbynriew Koch ha Meghalaya.