Dawa Ki Waheh Kur Ri Jaiñtia ban ithuh ka JHADC da ka aiñ ia ki jait Kur

Ka Dorbar Ki Waheh Kur Ri Jaiñtia ha ka jingialam u K.L Pariat kum u President, u Vice President bad General Secretary hynne ka sngi kila leit mih biang sha JHADC ban dawa na u CEM ba dei ban ithuh kloi noh da ka aiñ jong ka council ia ki jait Kur bapher bapher, namar ba kane ka jingdawa ka dang iai sahteng haduh mynta wat bad na ka liang ki nongialam ka Dorbar Ki Waheh Kur kumjuh ki nongialam jong ki jait Kur bapher bapher ki leit pynkynmaw na ka por sha ka por lyngba ki jingthoh kumjuh ka jingiakynduh bad u CEM, u EM ba dei peit kumjuh bad ki ophisar. Hadien ba kine ki nongialam seng kur kila ioh iakynduh bad u CEM JHADC u Thombor Shiwat, ki iathuh ba u CEM ula ong, ba yn ai noh daka executive order bad ban lum iaka executive committee naka bynta ban pass iaka resolution.

Kumta kane ka jingkren jong u shi bynta kala wanrah jingkyrmen iaki, bad kila buh por ruh ba hapoh ka 25 tarik mynta u bnai shwa ban pynmih iaka notification naka bynta ka election MDC, ka Executive Committee hapoh ka jingialam u Thombor Shiwat kum u CEM ka dei ban pynmih noh iaka jingthoh khang ba kum ka jaitbynriew kan shngaiñ.. Halor kane ki nongialam ka Dorbar Ki Waheh Kur kila ai jingmut ruh ia u CEM ba dei ban phah ruh iaka executive order sha u DC ka East bad West Jaiñtia khnang shwa ba kin ai iaki schedule tribe certificate kin ai katkum ba la ithuh daka JHADC.

Ha kajuh ka por ki kyntu ruh iaki nongmihkhmat ki ophisar ba kin bud ryntih bad treikam katkum ka aiñ ym ban ap haduh ban da don ka jingiakhih ka jingiamih surok namar kane kam dei ka nuksa ba bha iaka pateng ban wan.U K.L.Pariat u iathuh ba haka jingiakynduh bad u CEM kila iakren ruh halor ka jingrung kyrthep ki mynder kiba wan kum ki riewlum na mayanmar bad ki Garo na Bangladesh, da kaba dawa ia u kum u khlieh ka JHADC ba u dei ban ai noh ka hukum iaki Dolloi ki waheh shnong ba kin sangeh noh ka jingai NOC sha kum kine ki jaitbynriew ba wan buhai shnong.