U Member of Parliament (MP) ka Shillong Parliamentary Seat u Dr Ricky AJ Syngkon hynne ka sngi u la pynsngew hapoh ka Parliament ba dei ban weng noh mardor ïa u Vice Chancellor (VC) ka skulbah North Eastern Hills University (NEHU) Shillong. Ïa kane u MP ka Shillong ula dawa haba wanrah ia ka Zero Hour Notice hapoh ka Parliament.
Haba kren hapoh ka Parliament, u Dr Ricky ula ong, “Mynta kane ka skulbah (NEHU) kaba don ka motto ‘To rise up and build’ ka don hapdeng ka kynrum kynram bad ka daw ka dei namar ka jingbym biang u nongialam”. U Dr Ricky ula ong, naduh ar bnai ba la dep kane ka skulbah kam shym la treikam bha ban ai jinghikai ia ki samla pule lane ka jingpynlong ia ki jingwad bniah katkum ka thong jong kano kano ka skulbah.
U MP ula kynnoh ba ka jingbymlah jong u VC ba mynta ka la pynlong ia ki samla pule, ki nonghikai bad ki nongtrei jong ka skulbah ban iakhih bad ka la pynlong ia kane ka skulbah ban sahkut khlem da lah ban treikam.“Nga dawa na ki bor ba dei peit khamtam na ka tnat pule ban shimkhia halor kane bad ban weng mardor ïa u vice chancellor jong kane ka skulbah” la ong u Dr Ricky.