Donkam ban bishar bniah ha shuwa ban pyntreikam ILP, MRSSA: Hek

U Nongialam ka BJP bad MLA ka Pynthorumkhrah Bah AL Hek ula kyntu ia ka Sorkar Jylla ba kan pynlong ka jingkhmih bniah ia kaei kaba lah ban leh bad ka bym lah ban leh ha shuwa ban pyntrei kam ia ka Inner Line Permit (ILP) bad ka Meghalaya Residents Safety and Security Act (MRSSA) ha Jylla.

Katkum ka jingong jong u, kano kano ka ain ka dei ban pynbiang tarajur ia ka jingmyntoi jong ki trai shnong bad kito kiba wan kai sha ka Jylla.

Haba kren sha ki nongthoh khubor u Bah Hek ula ong, ba ka jingphai khmat ka dei ban long halor kaei “kaba lah ban leh” bad ki jingmyntoi ia baroh ki kynhun bapher bapher.

“Haba ia dei bad ka ILP bad MRSSA, Nga kyrpad ia ka Sorkar Meghalaya bad ki paidbah ka Jylla ha ba ngi kwah ban pyntreikam ia ka ILP lane MRSSA ha Meghalaya, nyngkong ngi dei ban khmih kaei ba lah ban leh bad kaei kaba ngim lah ban leh” ula ong.

Ula bynrap ba ka jingpyrkhat banyngkong eh ka dei ban long ka bha ka miat jong ki paid nongshong shnong ka Jylla, haba pyrkhat ia ki briew ba nabar, khamtam ki nong jngohkai.

“Kumta, ka bynta ba lah ban leh ka dei ban long ka jingmyntoi ia baroh ki briew, ym tang ia ki nongshong shnong ka Meghalaya. Nyngkong ngi hap ban khmih ia ka jingmyntoi jong ki paidbah ka Jylla, ngi hap ruh ban khmih ia ka jingshngain bad jingmyntoi ki briew ba wan sha Jylla khamtam ki nong jngohkai” ula ong.

Haba kylli ia ka lynti ba shakhmat, u Bah Hek ula kyntu ban pynlong ia ka jingwad bniah kaba janai bha ban pynthikna ba kano kano ka ain kam dei ban ktah ia ki nongshong shnong ba rit paid ka Jylla lane pyrkhing ia ki nongwankai.